Manamnama a makaawat dagiti graduado iti Technical and Vocational Education and Training (TVET) manipud iti Technical Education and Skills Development Authority (TESDA) iti tulong teknikal ken adal iti teknolohia manipud iti Department of Science and Technology (DOST).
Kinuna ni DOST Undersecretary Brenda Manzano a mabalin nga agusar dagiti graduado iti tech-voc kadagiti teknolohia ken pasilidad ti DOST.
Kinunana a dagiti nagturpos iti welding, mabalinda nga usaren ti kabaruanan a ramit iti DOST-Metals Industry Research and Development Center. Dagiti met graduado iti food processing, mabalin a mai-refer kadagiti pasilidad ken Food Innovation Centers (FICs) ti departamento. Naiwaras iti pagilian dagiti nasao nga FICs a mabalin a pakaprosesuan dagiti produkto a makan ken pakapasayaatan ti pannakaipakete dagiti produkto.
Linawlawagan ketdi ni Manzano nga ipaay ti DOST ti tulong iti uray asino man. Ngem gapu iti pannakaipartner daytoy iti TESDA, maipangruna itan dagiti graduado iti TVET.
Saan metten a nasken a mangalada pay iti referral manipud iti TESDA. Mabalinda ti agdiretso kadagiti regional office ti DOST tapno ma-assess no ania ti masapul dagitoy. Innayon ni Manzano a ti tulong ket mabalin a nayon a training, wenno tulong a teknikal.
(Naipablaak iti Bannawag iti Agosto 27, 2018 a bilang. Magatang ti pisikal a kopia kadagiti bookstore ken newsstand iti Kailokuan ken iti intero a pagilian ken ballasiw-taaw. Mabalin met nga i-download ti digital a kopia iti BUQO, MAGZTER ken PRESS READER.)
No comments:
Post a Comment