Maibilangen a pakaseknan ti sibubukel a pagilian wenno “national emergency” ti epidemia ti human immunodeficiency virus (HIV) iti Filipinas, kas kuna ni Dr. Rossana Ditangco, pangulo ti AIDS Research Group ti Research Institute for Tropical Medicine (RITM) ti Departamento ti Salun-at (DoH) itay nabiit.
Segun ken ni Ditangco a kaipapanan daytoy a saandan a makontrol ti napartak a yaadu dagiti biktima iti HIV.
Iti kaudian nga istatistika manipud iti report ti UNAIDS itoy a tawen, maipakita ti Filipinas nga addaan iti kangatuan ti kaso ti HIV infection iti Asia Pacific region. Iti dayta a rekord, ipakitana nga iti 2016, 83 a porsiento kadagiti baro a naimpektaran ket lallaki a nakiseks iti lallaki ken transgender a babbai a nakiseks met iti lalaki.
Maisupadi daytoy iti yaadu dagiti kaso iti Filipinas iti bumabbaba a bilang dagiti kaso kadagiti pagilian iti nasao a rehion. Segun iti rekord ti DoH, ngimmato iti 140 a porsiento dagiti kaso iti pagilian kadagiti tawen 2010 agingga iti 2016, a dua iti tunggal tallo a baro a pasiente, agtawen iti 15 agingga iti 24 a lallaki a nakiseks iti padada a lallaki.
Iti biang ni Secretary of Health Paulyn Jean Rosell-Ubial, kunana a daytoy epidemia iti HIV ti maysa kadagiti ipangruna ti departamento nga idauluanna. Kas kinunana, manayonan ti badiet iti panangagas iti impeksion, kasta met a kada ma-test a positibo iti HIV, dagus a maidiayaan iti agas, nalag-an man wenno nadagsen ti impeksion.
Kinunana a panggep pay ti departamento nga ipapati ti panag-screen kadagiti komunidad babaen ti panangikampania iti panagpa-test ken dadduma pay a serbisio a kas kadagiti lektiur ken panagipaay iti balakad.
(Naipablaak iti Bannawag, Agosto 14, 2017 a bilang.)
No comments:
Post a Comment