Rugian ti Departamento ti Edukasion (DepEd) ti random a pannaka-drug test dagiti estudiante iti hayskul ken titser kadagiti para publiko ken pribado a hayskul iti daytoy a Septiembre.
Kinuna ni Education Secretary Leonor Briones a gundaway daytoy ti departamentona a makaduktal iti kakaro ti panagusar iti droga dagiti estudiante ken titser; iti kasta, makatulongda a mangarisit iti kinaepektibo dagiti programa a manglapped iti droga kadagiti eskuela ken komunidad.
Impanamnama ni Briones a confidential wenno saan a maipubliko ti resulta ti drug test nga iwayat ti Departamento ti Salun-at (DOH).
Kas kuna ni Briones, saan a maitudo no asino dagiti ma-drug test ken saan a maibunannag dagiti maduktalan a positibo nga agus-usar iti maiparit nga agas.
Saan ketdi a kas iti wagas dagiti kameng ti Philippine National Police (PNP) a mangiwaywayat iti programa nga Oplan Tokhang a mapanda mamalaybalay wenno agtoktok iti pagtaengan dagiti maatap nga agar-aramat ken aglaklako iti droga ket maidiayaan iti gundaway a sumuko.
Segun iti DepEd Order Number 40, series of 2017, mapakaammuan nga umuna dagiti nagannak maipapan kadagiti alagaden ti random drug testing babaen ti maysa miting wenno komperensia. Masuratan met dagiti estudiante ken nagannak maipapan iti proseo ti drug test. No bilang saan a maisubli ti nagannak ti acknowledgement slip, saan a mapawilan dagiti mangimatmaton a mangiwayat iti drug test.
No maduktalan a positibo ti estudiante wenno titser, maiwayat ti confirmatory test. No positibo latta ti resulta, mai-refer ti estudiante wenno titser iti doktor wenno pasilidad nga akreditado ti DOH a pakaipaayan met kenkuana ti maysa a drug intervention program.
(Naipablaak iti Bannawag, Agosto 28, 2017 a bilang.)
No comments:
Post a Comment