Mairamanen ni Ombudsman Conchita Carpio Morales iti listaan dagiti naipaayan iti mabigbig a Ramon Magsaysay Award, ti maibilang a Nobel Prize iti Asia, iti pannakapadayaw dagiti Ramon Magsaysay awardees itay Agosto 31.
Tubo iti Paoay, Ilocos Norte, nabigbig ni Ombudsman Morales, kaduana ti lima pay a sabali a napadayawan, a babaen ti bukodda a tay-ak a pagtakeman, siaayatda a tumultulong iti padada a tao nga awan ti panangnamnamada iti pammadayaw a maipaay kadakuada.
Dagiti lima pay nga awardees (dua nga indibidual, ken tallo nga organisasion): Bezwada Wilson ti India (anti-manual scavenging activist), Thodur Madabushi Krishna ti India (emergent leadership awardee), ti Dompet Dhuafa ti Indonesia (para iti nasaysayaat pay a pannakaaramat ti sakat, maysa nga Islamic tax), ti Japan Overseas Cooperation Volunteers (a mangipapaay iti humanitarian services kadagiti rumangrang-ay a pagilian), ken ti Vientiane Rescue, maysa nga emergency rescue organization iti Laos.
Maibilang kadagiti malaglagip maipanggep ken ni Ombudsman Morales ti panamagsapatana, kas Supreme Court associate justice, ken ni Benigno S. Aquino III, a kas maika-15 a presidente ti Filipinas idi 2010, sa iti sumuno a tawen, nadutokan nga Ombudsman ti Filipinas a nangipila iti kaso kontra kadagiti nangangato nga opisial ti gobierno.
Iti panagtakemna a kas Ombudsman ti gapuna a pinadayawan ti Ramon Magsaysay Foundation ni Ombudsman Morales “gapu iti tured ti pakinakemna ken panangikomitna iti bagina iti panangsapul iti hustisia tapno marpuog ti panagkunniber a maysa kadagiti kadadakkelan a parikut ti pagilianna; panagbalinna a pagwadan ti kinadalus, kinaregget, sirmata ken panangidaulo iti kalidad a kangatuanen iti agpang ti serbisio publiko.”
Iti pannakapadayaw ni Morales, kaduanan ti 312 nga Asian laureates (a napadayawan sipud idi 1957) a natatakneng a lallaki ken babbai ken organisasion a gapu iti lideratoda, nakatulongda iti pannakaitag-ay ti kasasaad dagiti kakailianda ken namagbalin iti paggargarawanda a gimong a nasaysayaat ngem iti dati.
(Naipablaak iti Septiembre 12, 2016 a bilang.)
No comments:
Post a Comment