Deadline iti aplikasion iti Pasnaan 7, nayalud-od iti Oktubre 10

Nayalud-od iti Oktubre 10, manipud iti Septiembre 15, ti deadline iti panagawat iti manuskrito para iti Pasnaan 7 (7th Pasnaan Ilokano Writers’ Workshop) a maangay inton Nobiembre 18-20 (saan nga Oktubre 21-23, kas immuna a naipadamag) iti maysa a pagadalan iti Urdaneta, Pangasinan.

Iwayat daytoy ti GUMIL Filipinas (GF), ti gunglo dagiti mannurat nga Ilokano iti Filipinas ken iti ballasiw-taaw,  iti panangsangaili ti GUMIL Pangasinan, DepEd Urdaneta Chapter nga idauluan ni Dr. Edmund A. Bisquera.

Masapul a mangidatag ti tunggal aplikante babaen ti e-mail iti portfolio ti ania man kadagiti sumaganad: (a) uppat a daniw; (b) dua nga ababa a sarita, (c) uppat a daniw a para ubbing, (d) dua a sarita a para ubbing, (e) dua a personal a salaysay, (f) storyline para iti nobela ken dua a chapter daytoy. Masapul a nakasurat iti Ilokano dagiti nadakamat a sinurat ken addaan iti title page a nakailanadan ti nagan iti pluma ken linaonna (table of contents). Masapul a nakasurat ti nasao a portfolio iti Word format.

Malukonan dagiti manuskrito iti sabali a Word file a naglaon iti pudno a nagan ti autor, adres, pakakontakan a numero, e-mail address, ababa a pakasaritaan ti biag (bionote) ken kabaruan nga ID picture, ken may-e-mail iti gumil.filipinas@gmail.com; usaren ti paulo (subject) a “Pasnaan 7.”

Sangapulo a fellow ti mapili a maipaayanto iti libre nga akomodasion.

Para iti ad-adu pay nga impormasion, umawag wenno ag-text iti 0921- 602-1938 (AST) wenno ag-e-mail iti gumil.filipinas@gmail.com. (Pasnaan 7 Secretariat)


(Naipablaak iti Oktubre 3, 2016 a bilang.)