Maipakaammo kadagiti interesado a makipaset iti Maika-5 a Cordillera Creative Writing Workshop nga agawat pay laeng dagiti mangimaton iti aplikante agingga iti Septiembre 25.
Maangay ti workshop inton Oktubre 24-28, 2016 iti kampus ti University of the Philippines Baguio babaen ti panangiwayat ti University of the Philippines Baguio (UP Baguio) College of Arts and Communication (CAC) iti pannakitinnulong ti National Commission for Culture and the Arts (NCCA) a kas kangrunaan nga esponsor.
Kualipikado a mangidatag iti aplikasionda dagiti mannurat ken agngayangay nga agbalin a mannurat nga addaan iti putar iti ania man kadagiti pagsasao iti Cordillera a kas iti Ibaloy, Kankanaey, Ifugao languages, Kalinga languages, kdp., agraman iti Ilokano ken Pangasinan, ken uray pay iti Ingles ken Filipino.
Kas kinuna ni Dr. Elizabeth Calinawagan, Dekana ti CAC ti UP Baguio ken immuna a nangimaton iti CCWW, a silulukat pay ti CCWW para kadagiti agsursurat kadagiti dadduma pay a pagsasao iti pagilian.
Kadagiti napalabas a workshop a naangay, napili dagiti fellow babaen dagiti sinuratda kadagiti pagsasao nga Ibaloy, Kankanaey, Tuwali-Ifugao, Kalinga, Ilokano, Pangasinan, Ivatan, ken iti English ken Filipino.
Iti daytoy a workshop iti 2016, maawis pay nga agaplikar dagiti mannursuro, aglalo dagiti mannursuro iti elementaria iti Mother Tongue-Based Mutilingual Education (MTB-MLE).
Nakaangayen iti uppat a workshop iti napalabas a walo a tawen ti CCWW ti UP Baguio babaen ti tulong dagiti dadduma pay nga esponsor nangruna ti NCCA.
Naangay ti immuna a workshop idi 2007 iti kampus ti UP Baguio; idiay Saint Mary’s School of Sagada, Sagada, Mountain Province idi 2009; itit Supreme Hotel, Baguio City idi 2012; ken iti El Cielito Inn, Baguio City idi 2014.
Sangapulo ket lima a fellow ti mapili ken maikkan iti libre nga akomodasion iti UP Baguio Residence Hall bayat ti workshop. Silulukat ti aplikasion para iti amin nga interesado a saan a naub-ubing ngem 18 anios.
Masapul a mangidatag dagiti aplikante iti ania man kadagiti sumaganad nga orihinal ken di pay naipablaak a sinuratda: 3-5 a daniw wenno daniw a para ubbing, 2 nga ababa a sarita wenno sarita a para ubbing, wenno 2-3 a creative nonfiction.
Nasken pay a pakuyogan iti patarus iti Ingles wenno Filipino no saan nga orihinal a naisurat iti Ingles wenno Filipino dagiti piesa a maidatag.
Ipatulod dagiti manuskrito iti Microsoft Word document file a mapakuyogan iti resume ti autor, babaen ti email: cordilleracreativeww2016@gmail.com. Iti Septiembre 25, 2016 ti maudi nga aldaw ti panagawat kadagiti aplikasion.
Buklen ti workshop panel da Prof. Grace Celeste Subido, Dr. Victor Emmanuel Carmelo “Vim” Nadera Jr., Mr. Francis Macansantos, Mr. Frank Cimatu, ken Emeritus Prof. Delfin Tolentino, Jr.
Para kadagiti saludsod, makiuman iti direktor ti workshop, ni Junley Lazaga, iti e-mail iti jllazaga@up.edu.ph wenno iti secretariat iti email cordilleracreativeww2016@gmail.com wenno telefax (074) 444 8393. (JLL)
(Naipablaak iti Bannawag, Septiembre 26, 2016 a bilang.)
No comments:
Post a Comment