Walo a libro nga Ilokano, mayalnag iti Dap-ayan 2016

Walo a libro nga Ilokano ti mayalnag iti daytoy Abril 22, 2016 kabayatan ti umuna nga aldaw ti Dap-ayan 2016: ti Maika-48 a Nailan a Kombension Dagiti Mannurat nga Ilokano a pakairamanan ti dua a libro nga impablaak ti Tagnawa Series ti GUMIL Filipinas.

Dagiti libro a mayalnag:

Antolohia Dagiti Sarita nga Ilokano a naikapalaonan ti 25 a sarita; Antolohia Dagiti Daniw ni Ayat a buklen dagiti daniw ti 25 a mannaniw nga Ilokano; Miks & Tiks, umuna a koleksion dagiti kapipintasan a bilang ti nasao a komiks a sinurat ni Cles B. Rambaud ken inladawan ni Rudy Villanueva; Makasuratka Met iti Daniw a Para Ubbing Kas Maibatay iti Kurikulum, tips maipapan iti panagsurat iti daniw a para ubbing ni Johmar R. Alvarez;

Panangarakup iti Ipus ti Layap ken Dadduma Pay a Daniw, koleksion dagiti dandaniw ni Ariel S. Tabag; Rissik, koleksion dagiti daniw ni Elizabeth Madarang-Raquel; Tagapulot ti Diosen ken Dadduma Pay a Sarita, koleksion dagiti sarita ni Joel B. Manuel; ken Ti Karamba ni Insiang and Other Stories, koleksion dagiti sarita ni Jose P. Urata, Sr.

Maangay ti nasao a Dap-ayan 2016 iti Apayao Agri Eco-Tourism & Sports Complex, Payanan, San Gregorio, Luna, Apayao iti panangilungalong ti GUMIL Filipinas iti pannakitinnulong ti National Commission for Culture and the Arts ken iti panangsangaili ti GUMIL Apayao nga idauluan ni Apayao Board Member Remy N. Albano.

Kadagiti interesado a dumar-ay, makiuman iti 0928 607 3972 wenno iti facebook.com/events ti Dap-ayan 2016.

Kadagiti met interesado a maaddaan kadagiti libro a nadakamat iti ngato, makiuman iti 0921 602 1938. (GF Secretariat)


(Naipablaak iti Bannawag, Abril 18, 2016 a bilang.)