Berroy, Umuna iti Maikalima a Pasalip Alviya

Berroy

Ni Rhea Rose D. Berroy, tubo iti Manabo, Abra, ti nangabak iti Umuna a Gunggona iti Maikalima a Pasalip ALVIYA iti  Sarita babaen ti saritana a “Maria Clara.” Maysa kameng ti tribu dagiti Muyadan, nangrugi a nagsursurat ni Berroy kadagiti daniw iti Ingles ken Ilokano idi 2013. Agsursurat pay iti lengguahena nga Itneg. Nangabaken iti AMMAFLA ken Palanca. Nagturpos iti Unibersidad ti Santo Tomas, Manila ken maysa a lisensiado a Medical Technologist.

Kadua ni Berroy a nangabak da:

Jobert M. Pacnis, Maikadua a Gunggona para iti saritana a “Pagtaengan.” Maysa nga inheniero ken maestro; mangisursuro ita iti Aparri West National HS.

Danilo Antalan, Maikatlo a Gunggona iti saritana a “Kapipintasan”. Nakasuraten iti pinullo a sarita pakairamanan ti sangapulo a sarita a nangabak iti Umuna a Gunggona. Adama a reporter ken announcer iti DZTP Radio Tirad Pass iti Candon City.

Arnold Pascual Jose, Umuna a Pangliwliwa a Gunggona para iti saritana a “Lakay Moses.” Maysa a Fellow iti 29th UP National Writers Workshop, Baguio City, idi Abril 1997. Naminduan a nangabak iti Palanca Awards (2001 ken 2006). Tubo iti Bacsil Norte, Siudad ti Laoag.

Daniel L. Nesperos, Maikadua a Pangliwliwa a Gunggona babaen ti saritana a “Ni Naranghado, ni Barbie ken ni Imee Danica.” Tubo iti Brgy. 19, San Lorenzo, San Nicolas, Ilocos Norte. Fellow iti Daniw iti Ilokano iti UP National Writers Workshop idi 1996.

Eden Cachola-Bulong, Maikatlo a Pangliwliwa a Gunggona para iti saritana nga “Ama Olding Dos”. Maysa a retirado a Master Teacher iti Francisco Benitez Elementary School, Tondo, Manila. Agpapaay a Tesorera ti GUMIL Filipinas.

Mapadayawanto dagiti nangabak bayat ti 48th GF National Convention a maangay iti Luna, Apayao itoy nga Abril 22-24, 2016.

Tinawen nga esponsoran ni Alex Vicente Yadao, agnaeden iti New York, USA, ti Pasalip ALVIYA iti Sarita, ken imatonan met ni Dr. Freddie P. Masuli iti Cagayan State University, Sanchez Mira.

Nagserbi a hurado da Cles B. Rambaud, Joel B. Manuel ken John B. Buhay.

(Naipablaak iti Bannawag, Abril 25, 2016 a bilang.)