Materiales a pagbalay, nguminngina

Nguminngina ti presio dagiti materiales a para iti konstruksion gapu iti dumakdakkel a panagkasapulan, kas imbunga ti pannakayimplimentar dagiti dadakkel a proyekto iti impraestruktura ti gobierno ken ti umad-adu a balay ken kondominium a bangbangonen ti sektor pribado.

Itay Abril 10, iti maikadua a gundaway, impangina dagiti agar-aramid iti semento ti produktoda, kas iti panangipangina ti Cemex, ti kadakkelan a kompania ti semento iti pagilian, iti P10 ti sangasupot a semento. Gapu itoy, ti dati a P217 a presio ti sangasupot a Cemex, nagbalinen a P227.

Sakbayna, idi Pebrero itoy met laeng a tawen, impangina dagiti agar-aramid iti semento ti produktoda iti sumurok-kumurang nga P6 ti sangasupot.

Malaksid iti semento, ngimmina ti presio dagiti landok iti 20 a porsiento, nangrugi met idi Pebrero itoy a tawen.

Kuna ti Cement Manufacturers Association of the Philippines a dumakdakkel ti panagkasapulan iti semento gapu iti irarang-ay ti indusria ti konstruksion iti pagilian.


(Naipablaak iti Bannawag, Abril 18, 2016 a bilang.)