Ni Ronelyn B. Ramones ti Bacarra, Ilocos Norte ti nangabak iti Umuna a Gunggona iti Salip iti Sarita a Para Ubbing ti 13th Reynald F. Antonio Awards for Iluko Literature (RFAAFIL 2014-2015) babaen ti saritana a "Dagiti Papa ni Hannah." Nagturpos iti Midwifery iti Northwestern University. Nakaipablaaken iti sumagmamano a daniw ken saritana iti Bannawag. Daytoy ti maikadua a panangabakna iti pasalip ti RFAAFIL.
Ni met Jobert M. Pacnis ti Ballesteros, Cagayan ti nangyalat iti Umuna a Gunggona iti Salip iti Daniw a Para Ubbing babaen ti daniwna nga "Iit." Nalpasna ti BSECE idiay Cagayan State University, siudad ti Tuguegarao idi 2000. Nangisuro kadagiti dua a pribado a pagadalan iti ilida, ti NCCFI ken Quezon Colleges of the North. Adun dagiti pammadayaw a nagun-odna iti pasalip ti RFAAFIL.
Dagiti dadduma pay a nangabak iti Sarita a Para Ubbing:
Maika-2, Mary Antonette M. Ramos ti Quezon City babaen ti saritana a "Maria Clarita, Mario Clarito." Agtawen iti 22 ken estudiante iti University of the Philippines Diliman, Quezon City. Adda iti maikapat a tukad iti kursona a BA Malikhaing Pagsulat sa Filipino.
Awan mapadayawan iti maikatlo, maikapat ken maikalima a gunggona.
Duapulo ket lima amin dagiti naisalip a sarita ngem inkeddeng dagiti hurado a dua laeng dagiti mapadayawan.
Dagiti dadduma pay a nangabak iti Daniw a Para Ubbing:
Maika-2, Johmar R. Alvarez ti Ballesteros, Cagayan babaen ti daniwna a "Maiparit ti Agtsinelas." Agdama a mangisursuro iti Aparri West National High School – Aparri, Cagayan ken adviser ti The Beachcomber, ti opisial a pagiwarnak ti nasao a pagadalan. Premiado a mannaniw a pakaibilanganen ti pasalip ti RFAAFIL.
Maika-3, Benjamin P. Pacris ti Bantay, Ilocos Sur babaen ti daniwna a "No Siak Koma ni Lam-ang." Isu ti agdama a provincial manager ti Philippine Information Agency iti Ilocos Sur. Anchor ti PIA radio program “Niat Makunam Kailian” iti DWRS iti Heritage City ken moderator iti “Kapihan iti Amianan” Media Forum. Premiado a mannaniw iti pasalip ti RFAAFIL.
Maika-4, Jobert M. Pacnis ti Ballesteros, Cagayan babaen ti daniwna a "Karayan." Isu met laeng ti nangabak iti umuna a gunggona.
Maika-5, Rolando A. Seguro, Jr. ti Lasam, Cagayan babaen ti daniwna nga "Intayon Idiay Kapilia." Agtrabtrabaho iti Rural Bank of Gattaran, Inc. - Allacapan Branch kas General Bookkeeper. Kaay-ayona ti agputar iti daniw, sarita ken liriko ti kanta..
Maika-6, Delfin P. Dumayas ti San Nicolas, Ilocos Norte babaen ti daniwna a "Bullalayaw." Nagdirektor iti GUMIL Filipinas. Adun ti naipablaak a sarita ken daniwna iti Bannawag. Nagsursurat pay ti drama iti radio. Damona ti mangabak iti pasalip ti RFAAFIL.
Uppat a pulo ket pito amin dagiti naisalip a daniw. Inkeddeng dagiti hurado manayonan iti maysa dagiti mapadayawan. Mayawat dagiti pammadayaw kadagiti nangabak iti Maika-49 nga Anibersario ti GUMIL Metro Manila iti Golfhill Terraces Clubhouse, Manotok Drive, Old Balara, Quezon City inton Disiembre13, 2015. Mayawatto pay dagiti sertipiko dagiti nangabak iti 12th RFAAFIL Reader’s Choice Award.
Maidasar met dagiti nangabak a sarita ken daniw iti 13th RFAAFIL kadagiti agbasbasa nga ubbing tapno pilienda ti mapadayawan iti 13th RFAAFIL Reader’s Choice Award. Maysa a laptop ti premio iti magustuan dagiti ubbing a sarita idinto a cash prize ti maited iti mapilida a daniw. Maiwaragawagto ti pakaangayan ti awarding kadagiti mangabak iti 13th RFAAFIL Reader’s Choice.
Dagiti naghurado (iti sarita): Cles B. Rambaud, pangulo; kameng da Juan Al. Asuncion ken Ariel S. Tabag; (iti daniw): Daniel L. Nesperos, pangulo; kameng da Joel B. Manuel ken Eliseo B. Contillo.
(Naipablaak iti Bannawag, Disiembre 14, 2015 a bilang.)
No comments:
Post a Comment