49 a tawen dagiti mannurat iti Kamanilaan, marambakan

Ladawan iti pannakarambak ti Maika-48 nga Anibersario ti GUMIL Metro Manila.

Rambakan ti GUMIL Metro Manila, gunglo dagiti mannurat nga Ilokano iti Kamanilaan ken kabangibangna a probinsia, ti maika-49 nga anibersario daytoy itoy a Disiembre 13, 2015 iti Golfhill Terraces Clubhouse, Old Balara, Quezon City.

Babaen ti tema a “Padaya Para iti Literatura,” naawis ni Edgar S. Godin, editor ti Bisaya Magazine (kabsat ti Bannawag), a kangrunaan nga agsarita.

Naawis pay nga agibasa iti daniw da Liwayway Editor Perry C. Mangilaya, Bisaya Literary Editor Richel Dorotan, Vincent Cab. Berroy, Linda T. Lingbaoan-Bulong, Marcelino D. Santos ken dadduma pay a mannurat iti nadumaduma a lengguahe.

Maangay pay iti nasao nga okasion ti pannakapadayaw dagiti nangabak iti Salip iti Sarita ken Daniw ti RFAAFIL (Reynald F. Antonio Awars for Ilokano Literature).

Malaksid kadagiti paripa ken sagut iti Paskua, mayalnag met dagiti libro a sinurat dagiti kameng ti GMM. Agsapatanto pay dagiti baro a kameng ti gunglo.

Tampok iti nasao a pasken ti pannakayalnag ti agmakatawen a selebrasion ti Maika-50 nga Anibersario ti GUMIL Metro Manila.

Manamnama a dumar-ay iti daytoy a pasken dagiti pasado a presidente, pangamaen, ken dadduma pay a nagbalin a paset iti GMM.

Para iti dadduma pay a detalye, ag-text iti 0921 602 1938. (Anna Liza M. Gaspar)

(Naipablaak iti Bannawag, Disiembre 14, 2015 a bilang.)