Korte Suprema, nangipaulog iti TRO kontra iti pagannurotan ti Comelec a ‘No Bio, No Boto’

Pinasardeng ti Korte Suprema ti Commission on Elections iti panamagbalinna nga imbalido iti rehistrasion dagiti botante a saan a nakapag-biometrics para iti eleksion inton 2016.

Impaulog ti Korte Suprema ti Temporary Restraining Order (TRO) iti order kontra iti pagannurotan ti Comelec a “No Bio, No Boto” kalpasan ti pannakakuestion ti nasao a pagannurotan a mailabsing daytoy iti Konstitusion ken pannakapukaw ti karbengan nga agbotos ti nasurok a 3 a million a botante a saan a nakapagpa-biometrics.

Kuna ni Theodore Te, pannakangiwat ti Korte Suprema, nga epektibo ti TRO agingga iti adda baro a pangngeddeng mainaig iti nasao nga isyu.


(Naipablaak iti Bannawag, Disiembre 14, 2015 a bilang.)