NO Vhen Bautista, kunam, ay ket, wen, a.
Isuna ti am-ammo iti Kailokuan a Prince of Ilokano Songs.
Rambakannan ti maikaduapulo ket lima a tawenna iti musika. Ket babaen dayta kadagiti serye ti pabuya ken sumagmamano nga album.
Wen, saan laeng a maymaysa nga album.
Ta agasem met ngamin ti 25 a tawen iti industria ti musika?
Kasla kaano laeng a nadiskobre isuna daydi Alfonso “Ahi” Lao a nakatakuat met laeng kada Bobby Gutierrez, Dolly Manuel, Linda Lazo, Jerameel Perucho, Sheryll Ignacio, Danny Palabay ken dadduma pay.
Tubo iti Santiago, Claveria, Cagayan ni Vhen. Nagturpos iti Dental Tech iti Centro Escolar University iti Mendiola, Manila.
Ngem iti panagbakasionna iti balay ti kabsatna iti Laoag City, natignay a nakisalip iti kinnantaan kadagiti nadumaduma nga estasion ti radio, pakairamanan ti DWLW Budyong— iti “Bukros a Bukangkang” a programa ni Harry Corpuz, maysa a composer/singer/album producer/radio announcer. Nairamraman ni Vhen iti grupo dagiti Bukros singers a naaw-aris a nagpabuya kadagiti nadumaduma nga ili iti Kailokuan ken iti Tanap ti Cagayan.
Nagangayanna, immakar ni Vhen iti Bombo Radyo Laoag DZVR, iti “Bombo Variety Show” a programa ni Alex Dumlao.
Adu met laeng ti nagaw-awis ken ni Vhen tapno agpabuya. Agingga a nagsarakda ken Ahi Lao ket indiayaan daytoy iti kontrata tapno agirekord kadagiti kanta nga Ilokano.
Ragup wenno various artists dagiti immuna nga album a nakairamanan ni Vhen. Idi naruay ti request kadagiti kantana a “Sika Laeng” (a nag-duet-anda ken Linda Laza) ken “Diakton Agbiag,” naikkan iti gundaway ni Vhen para iti solo nga album. Nagsasaruno a nairuar dagiti albumna a Kastoy Gayam Ni Ayat, Lamina Ni Bobby Gutierrez, Musika ni Vhen Bautista Agpaay Kenka, ken ti immuna amin a 40 Non-Stop Ilocano Disco Medley with the LA Star Singers.
Saanen a naigawid ti itatayok ti nagan ni Vhen Bautista ket nakagteng payen iti ballasiw-taaw ti kinalatakna, nangruna iti estado ti Hawaii. Napasarunuan pay dagiti solo album-na.
Pinadas met ni Vhen ti gasatna iti Kamanilaan. Nagkankanta kadagiti nadumaduma a bar bayat nga intultuloyna met ti panagirekordna kadagiti Ilokano a kanta. Nagsarakda ken Boy Christopher a maysa a composer ket naipasngay dagiti dua a nagsaruno nga album ni Vhen a naglaon kadagiti kanta a Tagalog iti babaen ti Alpha Records. Babaen ti naganna a Chino Romero, napaglatak ni Vhen dagiti kanta a “Walang Ibang Mahal” ken “Maling Akala” a nagbalin a paborito dagiti kumakanta iti videoke.
Apagapaman a naisardeng ti panaglatak ni Vhen iti tay-ak ti musika a Tagalog idi napan iti America iti sidong ti asawana a ni Rosario (Ross) a maysa a nars. Nagsaruno a naipasngay dagiti annakda a da Mikaela ken Keanu Ven. Inkeddeng dagitoy a pagbinnuliganda ti panangpadakkelda kadagiti annakda iti America.
Nupay kasta, iraprapin met latta ni Vhen ti panagkankantana. Nairamraman met latta kadagiti album a various artists ken nagtultuloy met latta ti pannakaawisna nga agpabuya— a kakaduana payen dagiti annakda ken Ross. Nagtultuloy latta ngarud a nangnangngeg ti nalamuyot a timekna kadagiti pagtaengan iti Kailokuan ken kadagiti komunidad dagiti Ilokano iti America.
Ket iti daytoy maika-25 a tawenna iti industria, rambakanna daytoy babaen dagiti baro nga album a Duapulo ket Lima a Tawen, Vol 1. Dakayo ken ti Aweng Pudno a Kaduak ken Vol 2, Bituen ti Amin a Panawen. Puro orihinal a kanta ti linaon dagitoy nga album.
Nakaay-ayat ta nabukel dagitoy nga album babaen ti panagtitinnulong dagiti gagayyem ni Vhen iti nadumaduma a paset ti lubong— pagyamanan ti tulong ti baro a teknolohia.
Mangngegan met ni Vhen kadagiti mini-concert-na kadagiti sumaganad: 97.9 Radyo Kalugaran Claveria, “Kantaanka Kalugaran,” tunggal Sabado iti 8-9 iti rabii; 93.7 FM Radyo Kailian Sta Maria, “Vhen Bautista & Kids Pinakbet Mini Concert,” tunggal Domingo, 7-8 iti bigat; DWRS Comando Radyo Vigan, “Rimat Dagiti Bituen” ni Freddie Boy Tan iti 9:30-10 iti bigat; KRM 97.9 FM, Internet The Pinoy Sounds a kukua ni Rey “Boboy P” Patao tunggal Mierkoles iti 6-7 iti rabii, oras ti Hawaii.
Rambakan pay ni Vhen ti maika-25 a tawenna iti industria babaen ti konsierto a napauluan iti “Ilocano Greatest Hits, Vhen Bautista & Friends” inton Enero 30 iti Filcom Center iti Waipahu. Makaduana iti daytoy a konsierto da Marie Prieto, Rosana Sarmiento, Jesabel Alonzo, Randy Valencia ken dagiti kumakanta iti Hawaii, ken dagiti dua nga annakda ken Ross, da Mikaela ken Keanu.
Iprodius ti JT Sounds a kukua ni Joel Toletino, tubo iti Badoc, Ilocos Norte ngem agnaeden iti Hawaii ti nasao a konsierto.
Ag-guest met da Vhen, Mikaela ken Keanu iti konsierto ni Reynaldo Ramos a napauluan iti “Affair of the Heart” iti Baldwin Auditorium iti Maui, Hawaii, inton Feb 6, 2015.
Kablaawandaka, Vhen! (Angelo “Eloy” Padua)
(Naipablaak iti Bannawag, Enero 19, 2015 a bilang.)
