Ni CLES B. RAMBAUD/Editor
Teacher I pay la ni baket ket, ne, singkuentanan. Bareng agbalinto metten a Teacher II.
NAKIGTOTAK iti dayta a bigat ta nagadu ketdin a kurkurantong ni baket a mapan a mangisuro. Kasla daytay katugangan a baket a gimmura iti pakikabkabbalayanna nga anak ken manugangna ket agbakuiten.
“Apay dagitoy loslosion kada bangbanglo a bitbitmo ita?” diak nagawidan a sinaludsod bayat a pinadasko a binitbit ti plastik a supot. Nagdagsenen!
“Aglakoak man met idiay eskuela kalpasan ti klase. Bareng maipromotak metten!” kinunana. Teacher I pay la ni baket idinto a sumagpaten a singkuentana.
“Maipromot?” naibbatak la ket ngarud ti bitbitko ket nawara dagiti nagtutuon a kaserola a nayon dagiti kargana. “Maipromotka nga aglakolako? Nakakitaam met iti kastan?”
“Dayta ti rigatna kenka ta taga-media-ka ngem kanayon a maudika iti damag,” kinuna ni baket. “Dimo kadi nabuya iti telebision wenno nabasa iti newspaper ti napasamak iti maysa a taga-MMDA nga aglaklako iti tupig iti kalsada? Nakauniporme pay! Ket nairekomendan a maipromot!”
Ah! Malagipkon.
Isu daytay agtraptrapik nga MMDA nga adda motorsiklona dita Caloocan City. Katawenan ni baket. No day off-na kano, aglaklako kadagiti kankanen a kas iti tinupig kadagiti motorista.
Ngem kasano nga ibagana a day off-na no nakauniporme met nga aglaklako? Usarna pay ti motorsiklona ta kameng ngarud pay ti MMDA Motorcycle Unit? Ket ag-counter flow pay no kua tapno sabtenna dagiti lakuanna a drayber kada pasahero?
Gapu ta nai-Facebook, nai-YouTube kada nai-Twitter nga aglaklako iti kankanen (ken imbaga met dagiti netizen a maysa a nadayaw nga aramid ti ar-aramidenna), pinaayaban ni MMDA Chairman Francis Tolentino iti opisinana. ‘Diay met traffic enforcer, agtigtigerger iti nerbiosna a napan ta ammona la ketdi a madi ti ar-aramidenna. Ta no saan, apay nga agtigtigerger?
Ngem, ne, dinakdakulap pay ni Tolentino ket dinaydayawna pay iti “kinapudno ken kinapanagparnuayna”!
Inladawan pay ni Tolentino a daytoy a traffic enforcer, napintas a pagwadan dagiti padana a traffic enforcer ta imbes nga agdadawat kadagiti drayber, aglako laengen iti kankanen.
Isu a diakto masdaaw no adu a traffic enforcer iti Kamanilaan ti nakauniporme nga aglaklako iti ikan kada nateng kadagiti kalkalsada. Agunipormeda, a, ta kas kuna ni Fernando Gonzales (nagan ti traffic enforcer), uray day off-na, aguniporme nga aglako tapno maguyugoyna dagiti tattao a gumatang kenkuana.
Hm, mayat sa nga agpayso.
“Ket aglakokanto met a nakauniporme?” kunak koma ken ni baket ngem awan met gayamen.
Kasla makitkitak lattan ni baketko, piman, nga apaman a mabatingting ti kampanilia ti eskuelada inton malem a mangipakdaar iti panaggibusen ti klase, mapanna lakuan dagiti nagannak dagiti pupils-na nga agur-uray iti asideg ti ruangan. Gapu ta nakauniporme (mangiparangarang iti autoridadna a kas maestra), ag-“three gives” wenno umutangto met dagiti nagannak iti lakona.
Hay, bareng mai-YouTube kada mai-FB met ni baket (napintas met gayam ti FB, ania?) ta ibaganto metten ni Apo Prinsipal ken ni baket nga isagananan dagiti papelesna ta irekomendana nga agbalinen a Teacher II.--O
(Naipablaak iti Bannawag, Nobiembre 24, 2014 a bilang.)
No comments:
Post a Comment