Literatura a para ubbing, maitandudo iti Maika-48 nga Anibersario ti GUMIL Metro Manila

Kas pannakipasetna iti programa ti gobierno mainaig iti pannakaisuro dagiti ubbing iti nakayanakanda a pagsasao, tampok iti pannakarambak ti Maika-48 nga Anibersario ti GUMIL Metro Manila, gunglo dagiti mannurat nga Ilokano iti Kamanilaan, ti literatura a para ubbing.

Mayalnag iti nasao a pasken ti maysa a libro a nakatiponan dagiti napili a kapipintasan a kabukbukodan a sarita a para ubbing a kas paset ti Pablaakan, programa iti serye ti panagipablak ti GMM.

Naawis a kangrunaan nga agsarita ni Liwliwa Malabed, Ilokana nga autor dagiti sarita a para ubbing iti Filipino ken Ingles.

Iti nasao a programa, maipabuya dagiti nadumaduma a kannawidan a musika ken panagidaniw saan laeng dagiti Ilokano no di pay ket dagiti dadduma a puli iti Amianan.

Paset ti pannakarambak ti anibersario ti gunglo ti panangrambakna metten iti Paskua a panagtao ni Apo Jesucristo. Manamnama pay a maiwaras ti kopia ti Saluyot, ti napagungar a pagiwarnak ti GMM, iti nasao a pasken.

Addaan iti tema a “Ni Gumiliano a kas Mangiwanwan iti Kurditan Ilokano,” maangay ti nasao a pasken iti Child Jesus College (iti Bagong Silang, Caloocan City) nga imatonan ni Bucaneg ken Balagtas awardee Jose A. Bragado inton Dis. 7, 2014, mangrugi iti alas nuebe iti bigat.


(Naipablaak iti Bannawag, Disiembre 1, 2014 a bilang.)