Adda Akem ti Amin iti Pannakasaluad ti Bukodtayo a Lengguahe

Ni LEONORA R. MELCHOR ti Siudad ti Batac

MAKAPARAGSAK dagiti maar-aramid ita a seminar maipanggep iti lengguahe ken literatura iti Ilokano a pagat-atendaran dagiti mangisursuro ken estudiante, kas koma iti naangay iti Sta. Teresita, Cagayan ken iti Marag Valley babaen ti panangilungalong ti GUMIL Cagayan, ti seminar a naangay iti Siudad ti Ilagan babaen ti tulong ti Bannawag, ken ti kaudian, ti naaangay a “Pangasaan” iti Banna National High School a nagatendaran dagiti estudiante iti hayskul manipud iti nadumaduma nga ili iti daya ti probinsia ti Ilocos Norte.

Sakbay ketdi dagitoy, dakamatek met dagiti seminar iti lengguahe ken literatura nga inang-angay ti GUMIL Ilocos Norte a para kadagiti mangisursuro iti elementaria (a nagat-atendaran met ‘toy numo, banag a nakalukatan dagiti matak iti kinapudno a maysaak met gayam kadagiti awan ammona idi maipanggep iti umno nga ispeling dagiti balikas nga Ilokano).

Makaparagsak, kunak, ta saan laengen a maiturong dagiti kakastoy a seminar kadagiti mannurat no di pay ket kadagiti mannursuro nga estudiante—ta no am-amirisen, dakkel met ti akemda, nangruna dagiti mangisursuro, iti pannakasaluad ken pannakapabaknang ti lengguahe ken literaturatayo.

Lalo pay makaparagsak ti nabasak a saan laeng a dagiti mangisursuro ti maaw-awisen a dumardar-ay kadagitoy nga aktibidad. Kas iti napasamak iti Sta. Teresita, Cagayan ken iti Marag Valley (Apayao), nagatendar pay dagiti opisial dagiti konseho ti barangay!

Mainaig iti daytoy, dakamatek pay dagiti gannuat ti GUMIL La Union ken SPADE a mangang-angay met kadagiti kastoy a seminar – a pagat-atendaran pay dagiti empleado dagiti nadumaduma nga opisina ti gobierno iti La Union.

Pammaneknek ngarud daytoy nga adda akemtayo amin iti pannakasaluad ti kabukbukodantayo a pagsasao. Agasem no amintayo koma, ammotayon ti husto nga ispeling ken uray payen grammar ti bukodtayo a pagsasao ken makapagsao ken makapasurattayo a nasayud babaen iti daytoy a lengguahe, a saan ket nga ipampamaysatayo ti mangad-adal kadagiti ganggannaet a lengguahe, nangruna unay ti Ingles.

Patiek itan a biddut ti kunkunada nga apay nga adalentayo pay laeng ti Ilokano ket ammotayo metten. Kadagiti naat-atendarak a seminar, natakuatak a siak a mismo, agkurang ti ammok maipanggep iti bukodko a lengguahe.

Nasayaat la unay no maitultuloy dagitoy nga aktibidad.--O


(Naipablaak iti Bannawag, Disiembre 1, 2014 a bilang iti seksion a "Ti Makunami".)