Iti laksid ti pannakaramrambak ti Buwan ng Wika iti tunggal Agosto iti tinawen, nagtalinaed a ‘ganggannaet’ ti lengguahe a Filipino saan laeng a kadagiti estudiante kadagiti probinsia no di pay ket iti Kamanilaan.
Kuna ti Departamento ti Edukasion nga adu kadagiti estudiante nga agnaed iti ruar ti Manila ti saan nga agsasao iti Filipino, addada man iti pagtaengan wenno iti eskuelada ket adu pay kadagiti pribado a pagadalan a gagangay nga Ingles ti maus-usar ditoy ti mangibilang iti Filipino a kas ganggannaet a lengguahe.
“Filipino-tayo amin ngem saantayo nga amin ket agsasao iti Filipino gapu ta agbibiagtayo iti maysa a multi-lingual a pagilian,” kinuna ni DepEd Curriculum Development Division OIC Dr. Rosalina Villaneza.
Innayonna nga iti kinapudnona, idi pay nga ar-aramaten ti adu a mangisursuro ti nakayanakan a pagsasao (mother tongue) nga isu ti us-usaren dagiti ubbing iti pagtaenganda tapno laeng maipaagsepda ti kayatda nga isuro kadagiti ubbing. No saan, agtalinaed a nakamulengleng dagiti ubbing.
Iti pannakaipakat ti Mother Tongue Based-Multilingual Education, nagbalinen nga opisial ti pannakaaramat ti tawid a lengguahe (ti mother tongue) iti pannakaisuro dagiti ubbing manipud iti Kinder agingga iti Grado Tres.
(Naipablaak iti Bannawag, Septiembre 1, 2014 a bilang.)
No comments:
Post a Comment