AGMULATAYO LATTA ITI KAYO. Nakaparparagsit dagitoy nga agad-adal iti Batac National High School iti Payao Campus bayat ti panagbunagda kadagiti grafted a mangga nga imulada kadagiti bakante a lugar iti likud ti pagadalanda. Malaksid iti panangisuro kadagiti ubbing ti pannakatagiben iti aglawlaw, nagbalin metten a paset ti tinawen nga aktibidadda ti panagmula kadagiti nadumaduma a klase ti kayo aglalo kadagiti agbunga a kas iti mangga, rambutan ken dadduma pay a mabalinto met nga apiten dagiti sumarsaruno kadakuada. Kas iti Siudad ti Batac, napinget ti panangipatpatungpal ti gobierno lokal ti panagmula iti kayo a kas paset iti programa a “Save the Quiaoit River, Mountains and Watersheds” tapno malapdan iti panaglayus uray bassit laeng ti tudo. Sipud pay idi 2009 a nairugi ti nasao a proyekto ket addan namulaan a nasurok a 4,000 nga ektaria kadagiti asideg ti ubbog ken kadagiti agkalbon a bambantay a naiget a supsuporatan dagiti amin a lumugar, ubbing ken nataengan. (Leilanie G. Adriano)
(Naipablaak iti Bannawag, Agosto 11, 2014 a bilang.)
No comments:
Post a Comment