Dinepdep ti Malakanyang ti panagamak dagiti Filipino, kagiddaan ti pakaammo a nainget ita ti panangsipsiput ti gobierno mainaig iti nasao a bayrus, nangruna ti Department of Health (DoH).
Segun ken ni Deputy Presidential Spokesperson Abigail Valte, addaan iti umdas a kabaelan ti DoH a mangamiris kadagiti aggapu iti Africa tapno manamnama nga awan ti addaan iti imet nga Ebola virus a makastrek iti pagilian.
Innayon ni Valte a naiget ti pannakabantay dagiti eropuerto tapno mapengdan ti panagwaras Ebola virus a kas met iti ar-aramiden ita dagiti dadduma a pagilian iti lubong.
Adda metten iti Alert Level 2 dagiti pagilian a nagwarasan ti virus, a kayatna a sawen a napakaammuan metten dagiti Filipino nga adda kadagitoy a pagilian tapno agan-annadda ken tapno dida agbiahe a mapan kadagiti pagilian nga apektado iti virus a kas iti Guinea, Sierra Leone ken Liberia.
Addaan metten kadagiti thermal scanner dagiti eropuerto iti pagilian tapno makita dagiti pasahero nga addaan iti simtoma ti Ebola a kas iti gurigor, panagpadara, panagsarua, ken panagsakit ti bagbagi tapno ma-quarantine dagitoy ken maamiris no positiboda iti nasao a sakit.
(Naipablaak iti Bannawag, Agosto 18, 2014 a bilang.)
No comments:
Post a Comment