Imbasura ti Regional Trial Court, Second Judicial Region, Branch 16 iti Ilagan, Isabela ti darum nga arson kontra ken ni dati a mayor ti Buguey, Cagayan, Ignacio M. Taruc, Jr., itay nabiit.
Iti desision ni Executive Judge Isaac R. de Alban a napetsaan iti Mayo 4, 2011, kinunana a kalpasan ti naiget a panangamiris ti korte kadagiti ebidensia a naipresenta kasta met dagiti nadakamat a linteg a nainaig iti kaso, awan ti nakita ti pangukoman a natibker a gapu ti pannakaipauli ti darum a maisupiat ken ni Taruc ta nakapsut ti kaso a naibatay iti affidavit da Joel Sumer, Jack Dumaual ken Romeo Taloza. Kinuna pay ti pangukoman nga awan ti sabali pay nga ebidensia ti prosekusion a mangiraman iti akusado iti nasao a krimen.
Babaen ti rekord ti kaso, indarum ni Vicente Unida, Jr.. general manager ti Penaranda Plants Trading ni Ignacio M. Taruc, Jr. iti Destructive Arson a kangrunaan a nakaibatayanna ti palawag ni Joel Sumer nga inaramidna idi Setiembre 3, 2009. Iti palawag ni Sumer, kinunana a sisasango idi ibilin ni Taruc ken ni Ronald Gonzaga ti pannakapuor ti plantasion ta daytoy ti pagtataudan ti pundo dagiti kalabanna iti politika.
Naipauli ti darum iti krimen a destructive arson kontra ken ni Taruc idi Marso 15, 2010 iti Regional Trial Court ti Cagayan, Branch 8, Aparri, Cagayan iti babaen ni Judge Conrado Manaois. Nupay kasta, indawat ni Taruc, babaen ti abogadona, iti Korte Suprema a mayakar ti panagusig. Idi Setiembre 6, 2010, nangipaulog ni Judge Conrado Manaois iti order, kas mainugot iti pakaammo ti Second Division ti Korte Suprema (A. M. No. 10-6-177-RTC; Re: Change of Venue) a naipaulog idi Hulio 21, 2010, a mangpayakar iti sibubukel a rekord ti kaso iti Executive Judge ti RTC, Ilagan, Isabela, a nakaituloyan ti panagusig ken nangyetnag iti nasao a desision a nangibasura iti darum kontra ken ni Taruc.
Tubo iti Pattao ken dati a mayor ti Buguey, Cagayan, napinget ni Taruc a mangikamkampania iti pannakasaluad ti environment kontra kadagiti aramid a makadadael iti nakaparsuaan.
(Naipablaak iti Bannawag, Agosto 15, 2011 a bilang.)
No comments:
Post a Comment