BALAY PARA ITI TUNGGAL KAAMAAN. Indauluan ni Bise Presidente Jejomar Binay kas chairman ti Housing and Urban Development Coordinating Council (HUDCC) ti maika-8 a leg ti Pabahay Caravan a naisayangkat iti Fort Ilocandia Resort, Laoag City, Ilocos Norte idi Agosto 8-9. Kinunana nga adda sisasagana a P50 bilion a pundo ti gobierno para iti pannakaipatakder ti nalaka ti pategna a balay para kadagiti awanan pay iti natalged a pagtaengan. Babaen ti pannakitinnulong ti sektor pribado ken dagiti nadumaduma a gobierno a lokal (LGUs), kalikaguman ni Binay a maikkan amin a pamilia iti pagtaengan ket saanen a kasapulan nga agupada pay no mabalinda met ti makaipatakder iti kabukbukodanda a balay nga in-inut a baybayadanda iti nababa laeng a kantidad gapu ta adda met mailatang a counterpart dagiti LGUs babaen ti panangitedda iti natalged a disso para iti daytoy a housing project iti nadumaduma a paset ti pagilian. Iti ladawan, yaw-awat ni Bise Presidente Binay ken ni Mayor Joe Foronda ti Vintar, Ilocos Norte, ti plake ti pammadayaw para iti gobierno lokal ti Vintar, ti kaunaan nga ili iti Ilocos Norte nga addaan iti enhanced land use plan iti probinsia. (Ladawan ken teksto: Leilanie G. Adriano)
No comments:
Post a Comment