Kampeon Dagitoy Mannala a Filipino!

Ni Rizza de Jesus, mannala manipud iti Halili-Cruz School of Ballet, a nangyalat iti Umuna a Gunggona iti kategoria dagiti mannala nga agtawen iti 18 agpababa iti 13th Asia Pacific Dance Competition.


Lugayantayo ti Halili-Cruz Dancers, Grand Slam Winner iti 13th Asia Pacific Dance Competition a naangay idiay Bangkok!

NANGYAWID manen ti Halili-Cruz School of Ballet (HCSB) iti dayaw iti pagilian. Isuda ti grand slam winner iti 13th Asia Pacific Dance Competition a naiwayat iti Kasetsart University idiay Bangkok, Thailand, idi Hulio 22-24, 2011.

Nadumaduman a pammadayaw manipud iti nadumaduma nga internasional a festival ken salisal ti inyal-alaten ti HCSB. Iti 13th Asia Pacific Dance Competition, a nakisalsalipanen ti nasao a ballet school iti nalapabas a 10 a tawen, inyalatna ti kaaduan kadagiti kangrunaan a premio iti nadumaduma a kategoria. Nasurok a 800 a mannala manipud iti 34 a propesional a dance company ken dance school manipud iti Asia Pacific region ti nakipaset iti nasao a salisal.

Inyalat ti HCSB ti dua nga aggregate trophies, walo a perpetual a tropeo, 36 a balitok a tropeo, 32 a pirak (silver) a tropeo, 20 a bronse a tropeo ken 64 a medalia kadagiti kategoria a nakipartsiparanda: Classical Ballet, Neo-Classical, Demi Character, Modern, National ken Lyrical.

Ti artistic team, nga idauluan ni artistic director Shirley Halili-Cruz ken dagiti ballet teacher ken choreographer a da Grace Garalde-Perez, Anna Tuazon-Balmadrid ken Anna Kathrina Halili Cruz, ti nangsanay ken nangkadua kadagiti 93 a mannala a nangabak iti salisal.

Kinuna ti Australiano nga adjudicator a nasanay a naimbag dagiti Filipino a bailarina (mannala iti ballet) ken isuda amin, napintas ti panagpabuyada—nakatibtibker ti teknik, artistiko met dagiti konsepto ken choreography; umno, elegante ken napintas ti pannakadesinio dagiti costume; umisu ti musika; natalek, napintas ti lung-ayda ken pagaayatda ti agsala. Maikari ngarud kadakuada ti pammadayaw nga inabakda. Nakaay-ayatda a buyaen. Linugayan pay ti nasao nga adjudicator dagiti nangsanay kadakuada.

Nangipatulod met ti Philippine ambassador to Thailand a ni Linglingay F. Lacanlale iti pangkablaawna a surat a nagkunaanna a ti balligi ti Halili-Cruz School of Ballet iti salisal, pammadayaw iti anus, dedikasion ken naluomen a padas iti pannakiparpartisipar iti nadumaduma a dance competition ken festival. Kanayon pay daytoy ti panangyendorso ti nasao nga ambassador iti pannakipartsipar ti Halili-Cruz School of Ballet iti 13th International Festival of Dance and Music itoy Setiembre 9, 2011 iti Bangkok.

Ti Shirley Halili-Cruz School of Ballet ti opisial a pannakabagi ti Filipinas iti Asia Arts Festival iti Chongqing ken Shanghai, China, inton Oktubre, 2011 ken iti England inton Nobiembre, 2011.—O

(Masarakan ti Shirley Halili Cruz School of Ballet iti 1227 Quezon Avenue, Quezon City. Mabalin a kontaken ti pagadalan iti tel. 372-4607 ken 413-0804. Adda sanga daytoy iti St. Pedro Poveda College, St. Mary’s College, School of St. Anthony, Alabang Country Club ken Miriam College, agpapada nga adda iti Metro Manila.)

(Naipablaak iti Bannawag, Agosto 29, 2011 a bilang.)