Saanen a maipakan kadagiti ubbing nga agad-adal ti fortified instant noodles; ketdi, dagiti nasusustansia a taraon ti maidaya kadagiti feeding program ti gobierno, kas impakaammo ti Departamento ti Edukasion (DepEd) itay nabiit.
Impaganetget ti DepEd a dagiti nateng nga apit dagiti umili iti lokalidad ti agbalin a kangrunaan a ramen ti taraon dagiti estudiante iti pre-school agingga iti Grade 3 tapno mapasayaat ti salun-atda ket maliklikanda ti panaglanganda (gapu iti sakit) ken lumaingda iti klase.
Tapno maisakad daytoy, ginutigot ni Sekretario Luistro dagiti opisial dagiti pagadalan ken dagiti nagannak nga agmulada iti nateng iti arubayan dagiti pagadalan ken pagtaengan.
Kuna pay ti Sekretario a panggep ti DepEd ti mangipasdek iti mataginayon a vegetable garden kadagiti amin a pagadalan iti elementaria ken sekundaria iti sibubukel a pagilian.
Innayonna pay a mismo a ti Central Office ti departamento ket addaan iti “Gulayan sa Paaralan”.
Bannawag, Hulio 18, 2011
No comments:
Post a Comment