Ni Idol Eugene ti Agtawid iti Trono ni Vhen?

DI PAY NALUTO, NAIBUSEN
Kolum iti Bannawag ni ANGELO 'ELOY' PADUA
(Naipablaak ti sumaganad iti Hulio 25, 2011 a bilang.)


Ni Idol Eugene ti Agtawid iti Trono ni Vhen?

ADDAN agtawid iti trono ni Vhen Bautista, Kabagis!

Dayta man ti inyemail kadatayo ni Kabagis Leilanie Adriano, Kabagis. Ni Lei ti maysa kadagiti mapagraraeman a regular a contributor ti Bannawag. Agpapaay pay a senior reporter ti Ilocos Times, pagiwarnak a masarakan ti opisinana iti Siudad ti Laoag.

Asino daytoy kuna ni Kabagis Lei nga agtawid iti trono ni Vhen a mabigbig met a Prince of Ilocano Songs? Eugene Tunac Marquez ti naganna. Sangapulo ket maysana laeng. Ngem isu ti kampeon ti “Pinoy Power Idol” a pasalip ti KPHI radio iti Hawaii.

Ket innem a natataeng ngem isuna ti inatiwna!

* * *

Ita, pagdidinnamagandan ti laing a kumanta ni Eugene. Kanayon a maimbitaran kadagiti tallaong a kas koma kadagiti party iti birthday, graduation, ken dadduma pay.

Kinapudnona, addan malinlinay nga album ni Eugene. Orihinal a komposision ni Kabagis Vhen dagiti kanta. Wen, ni Apo Vhen Bautista, Kabagis.

Kayatna kadi a sawen, ipatawiden ni Kabagis Vhen ti tronona?

* * *

“Proud na proud ako sa baby-ko,” kuna ni mommy-na a Maggie Tunac-Marquez.

Agpapaay ni Mommy Maggie a reporter/announcer iti RPN-DZRL Batac City.

Siempre, sumangkapannakkel met ni Daddy Victorino Marquez a maysa a nars iti Hawaii.

Agasem ta pagdidinnamaganen daytoy maikatlo iti uppat nga annakda.

* * *

Pagaayatda kano ketdi a sangapamilia ti agkanta iti videoke, Kabagis. Lalo idi adda pay iti Filipinas ni Eugene. Ngem saan a nadnadlaw, a, ta managbabain gayam daytoy ubing.

Kasano ngarud a nadiskobre?

Idi Mayo 2009 nga idadatengda iti Hawaii, adda naangay a welcome party. Ay, ket ginutigotda ni Eugene a kumanta. Ne, ta adda gayam inalat daytoy ubing!

Ditoyen ti nanipudan dagiti agsasaruno nga imbitasionna a mapan agkanta kadagiti parambak ken agtultuloy a panagrimat ti bituenna.

Ket itoy Hulio, Kabagis, manamnaman a rummuar ti album ni Eugene, kas impadamag met laeng kadatayo ni Kabagis Lei. Ket maysa kadagiti kantana, ipagpannakkelna a nayanak iti Filipinas ken maysa a napeklan nga Ilokano. Dayta man!

Good luck ngarud, Pinoy Power Idol Eugene!—O

(Pangur-urayanyo iti album ni Pinoy Power Idol Eugene Tunac Marquez, denggen ken buyaenyo man ti panagkantana ditoy Blog ni Idol Eugene.—AST)