Aw-asen Falls

AW-ASEN FALLS. Makita iti likudan dagitoy nga agiwarwarnak (kameng ti media) ken dagiti mangimatmaton iti turismo iti probinsia ti Ilocos Sur ti makapabang-ar buya ti Aw-asen Falls, maysa kadagiti kangatuan a dissuor iti Filipinas iti kangato daytoy a 120 a metro. Masarakan daytoy iti Brgy. Sto. Rosario, Sigay, Ilocos Sur, nasurok a maysa oras a sang-aten iti bantay manipud iti kalsada a pakadanonan ti lugan. (Ricardo Raguini)


(Naipablaak iti Bannawag, Nobiembre 17, 2014 a bilang.)

Rangtay ti Sugpon

RANGTAY TI SUGPON. Iti saan a mabayag, saanton a kasapulan pay dagiti umili iti Sugpon, Ilocos Sur nga aglugan iti bangka tapno laeng makaruarda iti ilida a mapan iti sentro gapu mabangonen ti rangtay ti ili. Naangay ti ground breaking ceremony idi Pebrero 19 iti panangidaulo da (agpakanawan) Sugpon Mayor Fernando Quiton Sr, dati a Deputy Speaker Eric Singson, Diputado Ryan Luis Singson ken Vice-Gov. DV Savellano a sinaksian dagiti dadduma pay nga opisial ken umili. Agdagup iti P70 a milion ti imparuar ti Department of Public Works and Highways idinto nga P18 a milion met ti aggapu iti congressional share manipud iti R.A. 7171 ti imparuar ni Dip. Eric Owen Singson tapno mairugi ti rangtay a nabayagen nga ar-arapaapen dagiti taga-Sugpon. (Mancielito S. Tacadena)

(Naipablaak iti Bannawag, Marso 4, 2013 a bilang.)

Sabang

SABANG, CABUGAO, ILOCOS SUR. Ibangbangkag dagitoy a mangngalap manipud iti Barangay Sabang ti bilog nga inusarda kalpasan a naitakdangda ti impakatda nga iket. Sigud a paggugusto a pagbungbongan dagiti mangngalap, maysa itan a “protected area” ti Sabang gapu iti panaglatak ti Kido's Point ditoy a kas surfing destination iti Ilocos Sur. (Ladawan: Ricardo Raguini/ Teksto: Mancielito S. Tacadena)

(Naipablaak iti Bannawag, Enero 9, 2012 a bilang.)

Kinapet ti dengue iti IS, umabot iti 2,293

Umaboten iti 2,293 ti kaso ti dengue a nairekord ti Phovincial Health team Office iti sibubukel a probinsia ti Ilocos Sur manipud Enero agingga iti agtengnga ti Agosto.

Daytoy ti impakaammo ni Provincial Heath team leader Benjie Castillo bayat ti Provincial Consultative Meeting Kontra Dengue iti Siudad ti Vigan idi Agosto 19.

Kayat a sawen daytoy a 370% ti ngimmatuan ti kaso no idilig iti 2010.

Kaaduan iti kaso a nairekord ti Siudad ti Vigan nga addaan iti 232, sumaruno ti Sto. Domingo, 201; ken nagpada iti 192 ti ili a Bantay ken Cabugao. Adda metten 12 a natay gapu iti daytoy. Karaman met kadagiti addaan iti makaalarma a panagngato ti kaso ti nasao a sakit dagiti ili ti Bantay, Vigan, Candon, Caoayan, Sta. Cruz ken Santa.

Iti panagsarita ni Gov. Luis “Chavit” Singson bayat ti programa, dinawatna ti suporta dagiti amin a sektor tapno tumulongda a manglapped iti dengue kadagiti lugarda gapu ta di ang-angaw ti didigra a paspasaren ita ti probinsia. Kinunana pay a masapul a pasayaaten pay ti programa a walking blood bank tapno adda madadaan a pangalaan iti dara no adda dagiti kaso nga emerhensia.

Indawat met ni Vice Gov. DV Savellano ang itultuloy ti kinamanagdaldalus kas kangrunaan nga igam kontra iti lamok a paggapuan ti sakit a dengue. Kuna daytoy a kasapulan ti community involvement itoy a gundaway tapno malapdan ti lalo pay a yaadu dagiti maapektaran.

Maipalagip nga indeklara ni Gov. Singson ti sibubukel nga Ilocos Sur iti babaen ti state of calamity idi Agosto 1 gapu iti panagraira ti nadakamat a sakit. (Mancielito S. Tacadena)

(Naipablaak iti Bannawag, Setiembre 5, 2011 a bilang.)