Deadline ti 4th Cabie PINILI, Peb. 29

Nayalud-od ti deadline ti 4th Honor Blanco Cabie Premio Iti Naisurat Iti Literatura Ilokana (Cabie PINILI), Salip iti Daniw a Para Ubbing, kas impakaammo ni Maria Rosa A. Cabie, esponsor ti nasao a pasalip, tapno maikkan iti naan-anay a panawen dagiti mannaniw a mangpabileg kadagiti sinuratda.

Adtoy ti kompleto a pagannurotan:

1. Esponsoran daytoy ni Maria Rosa A. Cabie, kaingungot ni Honor Blanco Cabie, premiado a sumasalaysay ken mannaniw, agiwarwarnak, orador ken debatista, ken propesor pay iti Literatura ken Kinaagiwarwarnak iti Metro Manila, ken dagiti annakda. Naluktan daytoy a salip iti panagsurat iti Daniw a Para Kadagiti Ubbing kadagiti amin a mannurat iti Iluko (Ilokano) ditoy Filipinas ken iti ballasiw-taaw.

2. Buklen ti pakisalip ti maysa a set ti lima a daniw a ti tunggal daniw, saan a nababbaba ngem 24 a linia. Naimakinilia wenno naikompiuter iti doble espasio iti 8 1/2 x 11 a papel a coupon bond. Maysa laeng a set dagiti daniw ti mabalin nga isalip ti tunggal mannurat.

3. Masapul a ti parbo a nagan ti maikabil iti manuskrito a pakisalip. No ipatulod babaen ti e-mail: dua nga MS Word document files ti idatag. Umuna, ti set dagiti daniw a pakisalip. Maikadua, ti parbo ken pudno a nagan ken pakasaritaan ti biag ti autor. No ipatulod babaen ti koreo: uppat a kopia ti idatag ken pakuyogan ti entry iti narikpan a sobre a nakailanadan ti paulo ti sarita, parbo ken pudno a nagan ken kabibiag ti autor. No iti e-mail, iturong iti cabiepinili.secretariat@yahoo.com. No iti koreo, ipatulod iti Cabie PINILI Secretariat, c/o Bannawag, Manila Bulletin Publishing Corporation, Muralla corner Recoletos Sts., Intramuros, 1002 Manila.

4. Makaammo ti makisalip a mangpili ti tema ti daniwna, ngem masapul a mainaig iti kultura ni Samtoy.

5. Rumbeng nga orihinal, di pay naipablaak, di naadaw iti ania man a naipablaaken a sinurat, saan a naipatarus manipud iti sabali a lengguahe, bukod a putar ti autor, ken di pay nangabak iti ania man a salip iti panagsurat dagiti daniw nga isalip.

6. Agbalin a kukua ti esponsor dagiti mangabak a daniw. Maikkan pay iti karbengan a mangedit, mangatur ken mangipablaak iti libro, magasin wenno periodikal a pilina nga awan sungsungbatanna iti autor. Ngem agtalinaed ketdi ti copyright iti autor.

7. Saan a mabalbaliwan ti pangngeddeng dagiti hurado— malaksid no maduktalan kalpasanna a linabsing ti mannurat ti Alagaden Bilang 5. Iti dayta a panaglabsing, maibabawi ti gunggona ket saanton a mapalubosan pay ti autor a makisalip iti ania man a salip nga esponsoran ti Cabie PINILI.

8. Dagiti gunggona: Umuna, P3,000; Maikadua, P2,000; ken Maikatlo, P1,500. Maikkatto ti 10 a porsiento iti tunggal premio ket maipan daytoy iti pundo ti GUMIL Metro Manila.

9. Mayawat dagiti premio inton Kalgaw 2012 bayat ti Maika-44 a Kombension Nasional ti GUMIL Filipinas.

10. Nasken a maawat ti pakisalip iti e-mail wenno iti koreo iti saan a naladladaw ngem 11:59 p.m. iti Pebrero 29, 2012.

11. Saan a mapalubosan a makisalip dagiti kakabagian ni HBC ken dagiti esponsor iti likub ti 4th civil degree of consanguinity ken affinity. MapawilSan pay dagiti kameng ti Bannawag a makisalip.

(Naipablaak iti Bannawag, Enero 23, 2012 a bilang.)

Pasalip ti AVAIL 2012

Panggepmo kadi ti makisalip iti 14th Abuan-Valdez Awards for Iluko Literature (AVAIL)? Adda pay gundawaymo—ta aggibus daytoy iti Peb. 29, 2012.

Adtoy dagiti pagannurotan:

1.Silulukat ti salip kadagiti amin a mannaniw iti Iluko, ditoy ken iti ballasiw-taaw, malaksid kadagiti nangab-abaken iti Umuna a Gunggona iti pasalip ti AVAIL.

2. Agatiddog ti daniw iti di ab-ababa ngem 20 a linia ngem di nasursurok ngem 28 a linia. Maysa laeng a daniw ti mabalin nga isalip ti kada mannaniw. Masapul nga orihinal, di pay nangabak, ken di pay naipablaak iti uray ania a magasin wenno pagiwarnak.

3. Maipapan iti kultura ken arte ti tema ti daniw amaisalip. Nasken met a maikompiuter wenno naimakinilia ti pakisalip ken maipatulod iti uppat a nalawag a kopia iti di naladladaw ngem Peb. 29, 2012 itoy nga adres: The AVAIL Secretariat, P.O. Box 15, Alicia, 3306 Isabela.

4. Awan nagan ti mannaniw nga agparang iti daniw. Mapakuyogan ketdi iti narikpan a sobre a naglaon iti pudno a nagan ti mannaniw, paulo ti daniwna, ladawan (2”x 2”), ken biodata.

5. Karbengan ti sponsor ti pasalip ti mangilibro kadagiti daniw wenno mangipablaak iti pilina a magasin.

6. Dagiti gunggona: Umuna a Gunggona, P2,000.00 ken plake; Maika-2, P1,500.00 ken sertipiko; Maika-3, P1,000.00 ken sertipiko; Maika-4, P750.00 ken sertipiko; ken Maika-5, P500.00 ken sertipiko. Mayawatto dagiti gunggona iti aldaw ti kombension ti GUMIL Filipinas inton kalgaw.

(Naipablaak iti Bannawag, Disiembre 26, 2011 a bilang.)

Padasek a Bangonen 'Toy Narpuog a Lubongko

padasek a bangonen 'toy narpuog a lubongko
kalpasan a pinanawannak a naklep, awanan-puot
iti dagumpo ti rebba ti rinebbam a taengko.

panunotek laeng a maipasngayak manen
ket sallukobandak ti sinamar ken ti linnaaw
lagipek dagiti umuna a tudo ti mayo
ket kagiddanko nga agtubo dagiti uong,
agrusing dagiti rettab; nga agkimaw dagiti tukak

agasak dagiti sugatko. ramanak ti dara
iti nabtak a bibigko. ngem silalagipak
kadagiti inem-emak a sabong ti kayanga,
kadagiti kinarut-omko a tultullaya

ammom ti pamay-ak iti pinagdaram a barukongko?
suatek dagiti riniwriw a puris ket ibistik ida
iti diding a mingmingmingak agingga a ti saem,
kasla laengen iti panangbuybuyak iti telebision
iti ladingit dagiti kettelen ti dengue,
dagiti gudasen ti didigra, aksidente, ken krimen

agingga a ti aningaas ti itatallikudmo, ipalagip
laengen dagiti rinibu a pinagbakuit ti gubat,
wenno ti rebolusion ti pagilian

iti kapanagan, padasek a say-upen
dagiti sabong-ruot, dagiti isu amin a puraw
a sabsabong a mangiladawan iti kinasadia
ti langit, ti karayan, ti baybay…

ket uray no ammom nga impetpettengko
a sikanto laeng ti pagrikusanna, padasek
a bangonen ‘toy narpuog a lubongko

--Ariel S. Tabag

(Naipablaak iti Bannawag, Nobiembre 21, 2011 a bilang.)

PITCH BLACK

(Daytoy ti patarus ni Apo Juan S.P. Hidalgo Jr iti bukodna a daniw a napauluan "Kidem ti Sipnget" nga adda met laeng iti baba.)


PITCH BLACK
by Juan S.P. Hidalgo, Jr.

It is pitch black,
Let us be cautious for all is precipice
On both sides of this road.
Certainly, those thunders
Have wakened the seeds
Of lightning flowers.
Nowhere, nowhere else to seek refuge,
Even in the eye of the cyclone,
When the bears and the eagles start to clash
In land and sky.

Can the lizards' cries be false,
Or the geckos' warnings;
Will the buyon fall,
Or the sintas wrong?
Too late to open the Book
To debate upon the lines,
The flood-head is coming:
Ay, who will carry
And bury after
The great war?

it is pitch black, my friends,
Come, let us be cautious
For all is precipice on both
Sides of this road….

Kidem ti Sipnget
Daniw ni Juan S.P. Hidalgo, Jr

Kidem ti sipnget,
Agan-annadtayo ta derraas
Aminen a bakrang 'toy dalan.
Sigurado, dagitay gurruod
Riniingdan dagiti bin-i
Ti sabong ti kimat.
Awan, awanen ti pagpilian,
Uray iti mata ti allawig,
No agririnnamasen dagiti oso
Ken agila iti daga ken tangatang.

Pumalso ngata dagiti saltek,
Wenno ballaag dagiti tekka;
Dinto ngata agligsay ti buyon,
Wenno biddut ti sintas?
Naladawen tapno ukraden pay ti Libro
Tapno diskutiren dagiti binatog.
Umayen ti ulo-ulo ti layus:
Ay, asinonto ti agibaklay
Ken agipumpon kalpasan
Ti dakkel a bakal?

Kidem ti sipnget, kakadua,
Ne, agan-annadtayo
Ta derraas aminen
A bakrang 'toy dalan….