Sin Tax Bill, naaprobaran

Kalpasan ti kalpasan ti 16 a tawen a pannakaipapaigidna iti Kamara, inanamongan ti bicameral conference itay Disiembre 11 ti pinal a bersion ti Sin Tax bill a manamnama a mangingato iti buis ti arak ken sigarilio.

Segun ken ni Sen. Franklin Drilon, masapul ti nayon a buis tapno marisut metten ti panagkasapulan iti dakkel a pundo a para iti salun-at.

Ni Drilon ti chairman ti Senate panel iti bicam a pakairamanan met dagiti senador a da Pia Cayetano, Sergio Osmeña III, Ralph Recto, Ferdinand ‘Bongbong’ Marcos Jr. ken Senate Minority Leader Alan Peter Cayetano.

Iti biang ti Kamara, saan a nakadar-ay ni Dip. Isidro Ungab, kas chairman, ket imbagian da diputado Jocelyn Limkachong, Eric Singson, Jannette Garin, Danilo Suarez, Luis Villafuerte, Arnulfo Fuentebella, Neptali Gonzales ken Henedina Abad.

Segun iti report ti bicam, makapataud ti nasao a sin tax bill iti P35.5-bilion iti umuna a tawen. Apaman a mapirmaan ni Presidente Benigno S. Aquino III, maparaburan met ti mapan a 5.2 a milion a pamilia a maiserrek iti Philippine Health Insurance Corporation (PhilHealth) iti 2013, ta mailasin ditoy ti pundo a P12.5 bilion para iti nasao a tawen, ken iti 2014, agbalin a P25-bilion ti pundo para iti daytoy. Aggapu amin dagitoy manipud iti buis a maukkon gapu iti baro a gakat.


(Naipablaak iti Bannawag, Disiembre 24, 2012 a bilang.)

Sabali a pagsapulan dagiti adda iti industria ti tabako, naipasigurado

Impatalged ni Senador Pia Cayetano a maaddaanto iti sabali a trabaho dagiti agmulmula iti tabako ken dadduma pay a mangmangged iti industria iti tabako iti posible a panagsuek ti industria ti tabako apaman a maanamongan ti pannakaingato ti “sin taxes” wenno ti singir iti buis dagiti sigarilio ken arak.

Segun ken ni Cayetano, saan a rumbeng nga aramiden a rason dagiti kontra iti sin taxes ti pannakapukaw ti trabaho dagiti mangmangged ken mannalon no bilang maingato ti singir iti buis ti arak ken sigarilio.

Kuna ni Cayetano nga ilabanna ti karbengan ti tunggal Filipino a maaddaan iti trabaho idinto nga innayonna a masapul a mangtakuat ti gobierno kadagiti sabali a pagsapulan a para maapektaran iti posible a panagsuek ti industria ti tabako.

Immunan nga impakaammo dagiti mangmangged a kontraenda ti nasao a gakat ta maapektaran ti pagsapulanda.

Inlawlawag met ni Senate President Juan Ponce Enrile nga awan ti an-anakenna iti maipanggep iti sin taxes idinto nga impaganetgetna a rumbeng nga adalen ti gobierno daytoy ta amangan no kumaro pay ti pannakaiserrek dagiti kontrabando a sigarilio ken arak iti Filipinas.

Kaykayat ketdi ni Enrile, kaduana ni Senador Ralph Recto, chairman ti komite iti ways and means, ti ad valorem tax a para kadakuada, ad-adda a maiparbeng ngem iti bersion ti sin taxes nga inaprobaran ti Kamara.

(Naipablaak iti Bannawag, Septiembre 10, 2012 a bilang.)

Buis ti sigarilio ken alkohol, kayat ni PNoy a maipangato

Anamongan ni Presidente Aquino ti panggep ti Kamara a pannakaipangato ti buis ti tabako ken dagiti produkto nga adda alkoholna tapno adda pangalaan ti gobierno iti nayon a pundo ken tapno pangupay kadagiti agtutubo nga agbisio.

Iti pannakiuman kenkuana dagiti agiwarwarnak itay lawasna, kinuna ti Presidente a ti mainayon a buis iti tabako nga agdagup iti P33-bilion, mausarto met laeng a para kadagiti programa iti pannakatagiben ti salun-at ken pannakapataud dagiti nayon a pamastrekan dagiti agmulmula iti tabako.

Panggep pay ti gakat a mangipangato iti makunkuna a “sin” taxes a rakraken ti monopolio iti industria ti tabako.

Iti agdama, maymaysa laeng a kompania ti tabako ti pakailaklakuan dagiti tabako a produkto dagiti mannalon isu a saan a mailaban dagiti mannalon ti kayatda a presio ti apitda.

(Naipablaak iti Bannawag, Mayo 28, 2012 a bilang.)