“Ilokano Ortho” ti DepEd, maipasurot iti “KWF Tarabay”

Kiniddaw ti Departamento ti Eduksion (DepEd) ti panangurnos koma dagiti kameng ti Bannawag iti ortograpia ti lengguahe nga Ilokano nga ar-aramaten ti departamento tapno mayayon daytoy iti ortograpia ti nasao a lengguahe nga immunan nga impaulog ti Komisyon sa Wikang Filipino (KWF).

Kiniddaw daytoy ni Dr. Rosalina J. Villanesa, focal person ti MTB-MLE ti DepEd, iti pannakiuman ti Bannawag kenkuana bayat ti workshop a para kadagiti language reviewers dagiti materiales nga isagsagana ti DepEd iti tulong ti Basa Pilipinas a para kadagiti mangisursuro ken agad-adal iti Grado 1 ken 2.

Mainaig iti daytoy, kinuna ni Dr. Villanesa nga adda kabukbukodan nga identidad ti lengguahe nga Ilokano isu a di nasken a maipasurot ti ortograpiana iti Ortograpiyang Pambansa.

Innayonna a nalawag pay a kuna ti DepEd Order No. 34 a saan nga inkapilitan (“maaaring gamitin”) ti panangsurot dagiti amin a lengguahe iti pagilian iti OP.

Sakbayna, kinuna ni Dr. Virgilio S. Almario, Chairman ti Komisyon sa Wikang Filipino, iti pannakiuman met laeng ti Bannawag kenkuana a saan nga inkapilitan a sumurot ti Ilokano iti ortograpia ti Filipino.

“Hanggat’ maaari,” kinunana idi masaludsod no rumbeng a maipasurot ti ortograpia ti Ilokano iti OP.


(Naipablaak iti Bannawag, Hulio 28, 2014 a bilang.)

Angayen ti GUMIL Cagayan: Seminar-workshop iti ortograpia ken gramatika ti Ilokano, maiwayat iti DepEd-Sanchez Mira

Angayen ti GUMIL Cagayan, iti pannakitinnulong ti DepEd-Sanchez Mira, ti maysa a seminar-workshop iti ortograpia ken gramatika ti lengguahe nga Ilokano inton Septiembre 27-29, 2013 iti Sanchez Mira Central Elementary School, Centro I, Sanchez Mira, Cagayan.

Kinuna ni Freddie P. Masuli, Presidente ti GUMIL Cagayan, a ti nasao a seminar-workshop ket isu ti maikadua a paset ti serye ti seminar-workshop iti ortograpia ken gramatika ti Ilokano a managan iti “Panaglaga Kadagiti Balikas.”

Paset pay ti serye ti pannakayadal ti panagsurat iti daniw ken sarita a para ubbing ken pannakaamiris dagiti gapuanan dagiti mannursuro iti elementaria mainaig kadagiti kasapulan iti panagisuro iti Ilokano.

Ti nasao a seminar-workshop ti maysa kadagiti programa ti GUMIL Cagayan para iti pannakatagiben ti Literatura Ilokana ken iti itutulongna iti programa ti Departamento ti Edukasion (DepEd) maipanggep iti “K to 12 Curriculum” a mangipagpaganetget iti pannakausar ti nakayanakan a pagsasao a kas pangisuro kadagiti agad-adal iti kindergarten ken agingga iti maikatlo a grado iti elementaria.

Katinnulong ti GUMIL Cagayan iti pannakaiwayat ti seminar-workshop ti DepEd iti panangidaulo ni Dr. Renato A. Hernandez, ti opisina ni Cagayan Board Member Vilmer V. Viloria ken ni Alex Yadao ti ALVIYA Foundation a nakabase iti New York. (Johmar Rosario Alvarez)


(Naipablaak iti Bannawag, Septiembre 30, 2013 a bilang.)

61,000 a baro a titser, panggep nga alaen ti Dept. of Education

Impakaammo ti Departamento ti Edukasion itay lawasna ti panggepna a mangala iti 61,000 a baro a mangisursuro tapno marisut ti panagkurkurang dagiti mangisursuro iti pagilian.
Naireport nga iti napalabas a tawen, agkurkurangen ti DepEd iti 47,000 a mangisursuro.
Babaen dagiti nayon a mangisursuro, marisut metten ti kaadu unay dagiti ubbing iti maysa a klase nga iggem ti maysa a mangisursuro.


(Naipablaak iti Bannawag, Mayo 13, 2013 a bilang.)

Robot a titser, posible

Posible a maaddaan ti Filipinas kadagiti robot a titser.

Daytoy ti pammati ti Departamento ti Edukasion (DepEd) kalpasan a nakitulag iti Korean Ministry of Education, Science and Technology (MEST) nga aramidenda nga information and communication technology (ICT)-based classroom ti maysa a pagadalan iti Parañaque City.

Kas kuna ti DepEd, agserbi a pilot school ti Parañaque National High School (PNHS) ti maysa a  21st century school iti Filipinas.

Kinuna ni Education Secretary Armin Luistro a tangay addatayon iti Information Age ket no umdas ti ammo iti ICT, kasta met nga ad-adda a maisagana dagiti estudiante para iti masakbayan.

Iti tulag, aramiden ti DepEd ti curriculum design, dagiti masakupan ti teaching-learning ICT ken daytoy pay nga ICT management system idinto a dagiti kompiuter, dekoriente a blackboard ken ti ramit iti web, ipaay ti MEST.

Naammuan a no nasayaat ti resulta ti proyekto, maiwayat met daytoy kadagiti sabsabali pay nga eskuela iti pagilian.

(Naipablaak iti Bannawag, Nobiembre 5, 2012 a bilang.)