Valdez, napili a coordinator ti Amianan a Luzon iti NCCA-NCLA

Ni Neyo Mario E. Valdez (tengnga, maikapat iti kanigid) ken dagiti kakaduana a napili a coordinator ti National Committee on Literary Arts (NCLA) ti National Commission for Culture and the Arts (NCCA). Nairaman iti ladawan dagiti dadduma pay a pannakabagi dagiti mannurat iti bukodda a rehion a nakipagbotos kadagiti napili a coordinator.

Ni Neyo Mario E. Valdez, mannurat ti Bannawag ken Sekretario-Heneral ti GUMIL Filipinas, ti kabarbaro a Northern Luzon Coordinator iti National Committee on Literary Arts (NCLA) ti National Commission for Culture and the Arts (NCCA).

Napili ni Valdez a regional coordinator kalpasan nga imbagianna dagiti mannurat nga Ilokano ken nabotosan a kameng ti Executive Committee ti NCLA iti naangay a General and Executive Council Election Assembly iti BayLeaf Hotel iti Intramuros, Manila idi Oktubre 29.

Maysa ti National Committee on Literary Arts nga adda iti babaen ti Subcommission on the Arts kadagiti national committees ti NCCA, ti ahensia ti gobierno nga agplano, makitinnulong kadagiti nadumaduma a sektor ken mangipaay iti grant para iti pannakasaluad ken pannakapadur-as ti arte ken kultura ti Filipinas.

Sinuktan ni Valdez ni Dr. Jim P. Domingo, mangibagi ti Bannawag, a saanen a nagpapili para iti membership iti komision iti daytoy a tawen.

Agpapaay ni Valdez, tubo ti Nanguneg, Narvacan, Ilocos Sur, a Public Relations Officer V ti National Tobacco Administration ken presidente ti GUMIL Metro Manila. Regular a kontributor kadagiti salaysay, piksion ken daniw ti Bannawag ken maysa kadagiti nangibagi iti GUMIL Filipinas iti Taboan Writers Festival iti Dumaguete City idi 2013.

Kadua ni Valdez iti komite da Dr. Juliet D. Mallari ti Defenders of Indigenous Languages of the Archipelago (Head ti Komite, Central Luzon); John B. Bengan ti Davao Writers’ Guild (Vice-Head, East and South Mindanao); Joyce Arriola ti UST Center for Creative Writing and Literary Studies (Secretary, National Capital Region); Yvonne M. Esperas ti Katig Writers Network (Assistant Secretary, Eastern Visayas); Maria Luna Sicat-Cleto ti Likhaan: Institute of Creative Writing (NCR); Merdeka Morales ti Samahan ng mga Dalubguro sa Filipino ti PUP (NCR); Dr. Priscilla S. Macansantos ti UP Baguio (Cordillera); Niles Jordan D. Breis ti Kabulig Bikol (Southern Luzon); Mary Anne T. Jaro ti University of San Agustin Fray Luis de Leon Creative Writing Institute (Western Visayas); ken Haidee Emmie K. Palapar ti Women in Literary Arts Cebu (Central Visayas).

Agtakem dagiti napili nga opisial ken coordinator iti tallo a tawen wenno manipud iti 2019 agingga iti 2021.


(Naipablaak iti Disiembre 1-15, 2019 a bilang. Para kadagiti kayatna ti ag-subscribe iti kopia ti Bannawag, ag-email iti subscription.mb@gmail.com. Para iti digital a kopia, mapan iti MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)