Panagraira ti ASF, nainget a bambantayan ti DA

Impakaammo ni Agriculture Secretary William Dar a nainget a bambantayan ti Department of Agriculture (DA) ti panagraira ti African Swine Fever (ASF) a nangapektaren iti sumagmamano a pagtaraknan iti baboy iti pito a probinsia iti Luzon.

Mainaig itoy, nangipaulog ti DA-CMTF iti Swine Bulletin No. 12 gapu iti pannakakompiskar dagiti quarantine guards kadagiti naproseso a karne ti baboy a maatap a naimpektaran iti ASF a naibiahe a naipan iti probinsia ti Mindoro.

Naideklarar metten iti state of calamitiy iti 12 a barangay iti Bayambang, Pangasinan gapu iti panagraira iti ASF. Nasuroken a 900 a baboy nga apektado ti naibilin a naikali iti nasao nga ili tapno malapdan ti panagwaras ti nasao nga epidemia.

Kinuna ni Secretary Dar a nasken ti panagtitinnulong dagiti amin a maseknan a gobierno lokal (LGUs), Bureau of Animal Industry (BAI), ken ti National Meat Inspection Service (NMIS) tapno malapdan ti pannagwaras ti sakit a mangkapkapet kadagiti baboy.

“Kiddawentayo kadagiti amin nga agtartaraken iti baboy a didan ilaklako pay dagiti tarakenda a kinapet ti ASF ken dida koma iprosproseso pay ti karne dagitoy tapno di agwaras ti bayrus,” kinuna ni Secretary Dar.

Kinuna pay ti sekretario a napintas nga addang ti panangipaulog ti Malakanyang iti direktiba a nasken a tumulong amin nga ahensia ti turay tapno malapdan ti pangwaras ti sakit.

Kinunana a di masolo a solbaren ti DA ti problema isu a nasken ti pannakikaykaysa dagiti amin nga ahensia a kas koma iti Department of Transportation babaen ti panangtengngelna kadagiti maatap nga impektado a karne iti pannakaibiaheda.

Mainaig itoy, impanamnama ni Secretary Dar a saan a mabaybay-an dagiti agtartaraken iti baboy ta addan inlatang ti gobierno a maitulong kadagiti maapektaran dagiti tarakenda iti nasao a sakit.

Innayonna a kasayaatan a paggatangan dagiti umili iti kasapulanda a karne dagiti aglasat iti NMIS. (Eliseo B. Contillo)


(Naipablaak iti Disiembre 1-15, 2019 a bilang. Para kadagiti kayatna ti ag-subscribe iti kopia ti Bannawag, ag-email iti subscription.mb@gmail.com. Para iti digital a kopia, mapan iti MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)