Aplikasion iti Pasnaan 10, agawaten ti GUMIL Filipinas

Agawaten ti GUMIL Filipinas, babaen ti komite ti Seminar-Workshop, iti aplikasion iti Pasnaan 10, ti maikasangapulo a tawen ti workshop iti panagsurat para kadagiti agdadamo a mannurat iti Ilokano, a maangay inton Marso 2020 iti Apayao State College iti Luna, Apayao.

Pagtitinnulongan daytoy nga iwayat ti GUMIL Filipinas, GUMIL Apayao, Bannawag, ken dadduma pay nga ahensia ken indibidual.

Masapul a mangidatag ti tunggal aplikante babaen ti email iti grupo dagiti sinurat (portfolio), ania man kadagiti sumaganad: (a) uppat a daniw; (b) dua nga ababa a sarita, (c) uppat a daniw a para ubbing, (d) dua a sarita a para ubbing, (e) dua a personal a salaysay.

Masapul a nakasurat iti Ilokano dagiti nadakamat a sinurat ken addaan iti title page a nakailanadan ti nagan iti pluma (pen name) ken linaonna (table of contents). Masapul a nakasurat ti nasao a portfolio iti Word format. Usaren ti 12 points Times New Roman, doble espasio (para iti sarita ken salaysay) wenno single space (para iti daniw) iti Letter size ken Normal margins.

Pakuyogan dagiti manuskrito iti sabali a Word file a naglaon iti pudno a nagan ti autor, adres, pakakontakan a numero, email address, ababa a pakasaritaan ti biag (bionote) ken kabaruan nga ID picture, ken may-email iti nmevaldez@gmail.com; usaren ti paulo (subject) a “Pasnaan 10.”

Agdalan dagiti sinurat iti panagarisit dagiti kameng ti Selection Board ti Committe on Seminar-Workshop ti GUMIL Filipinas. Mapakaammuan dagiti autor dagiti mapili a gapuanan babaen ti email ken/wenno awag iti selpon.

Dagiti mapili a fellow, maipaayan iti libre a pagplete nga agpapan ken agawid, libre nga akomodasion ken sangkabassit nga honorarium.

Aggibus ti panagidatag iti aplikasion iti Enero 10, 2020. Para iti ad-adu pay nga impormasion, umawag wenno ag-text iti 0977 141 7901 (NME Valdez) wenno ag-email iti nmevaldez@gmail.com. (Pasnaan 10 Secretariat)


(Naipablaak iti Disiembre 1-15, 2019 a bilang. Para kadagiti kayatna ti ag-subscribe iti kopia ti Bannawag, ag-email iti subscription.mb@gmail.com. Para iti digital a kopia, mapan iti MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)

Valdez, napili a coordinator ti Amianan a Luzon iti NCCA-NCLA

Ni Neyo Mario E. Valdez (tengnga, maikapat iti kanigid) ken dagiti kakaduana a napili a coordinator ti National Committee on Literary Arts (NCLA) ti National Commission for Culture and the Arts (NCCA). Nairaman iti ladawan dagiti dadduma pay a pannakabagi dagiti mannurat iti bukodda a rehion a nakipagbotos kadagiti napili a coordinator.

Ni Neyo Mario E. Valdez, mannurat ti Bannawag ken Sekretario-Heneral ti GUMIL Filipinas, ti kabarbaro a Northern Luzon Coordinator iti National Committee on Literary Arts (NCLA) ti National Commission for Culture and the Arts (NCCA).

Napili ni Valdez a regional coordinator kalpasan nga imbagianna dagiti mannurat nga Ilokano ken nabotosan a kameng ti Executive Committee ti NCLA iti naangay a General and Executive Council Election Assembly iti BayLeaf Hotel iti Intramuros, Manila idi Oktubre 29.

Maysa ti National Committee on Literary Arts nga adda iti babaen ti Subcommission on the Arts kadagiti national committees ti NCCA, ti ahensia ti gobierno nga agplano, makitinnulong kadagiti nadumaduma a sektor ken mangipaay iti grant para iti pannakasaluad ken pannakapadur-as ti arte ken kultura ti Filipinas.

Sinuktan ni Valdez ni Dr. Jim P. Domingo, mangibagi ti Bannawag, a saanen a nagpapili para iti membership iti komision iti daytoy a tawen.

Agpapaay ni Valdez, tubo ti Nanguneg, Narvacan, Ilocos Sur, a Public Relations Officer V ti National Tobacco Administration ken presidente ti GUMIL Metro Manila. Regular a kontributor kadagiti salaysay, piksion ken daniw ti Bannawag ken maysa kadagiti nangibagi iti GUMIL Filipinas iti Taboan Writers Festival iti Dumaguete City idi 2013.

Kadua ni Valdez iti komite da Dr. Juliet D. Mallari ti Defenders of Indigenous Languages of the Archipelago (Head ti Komite, Central Luzon); John B. Bengan ti Davao Writers’ Guild (Vice-Head, East and South Mindanao); Joyce Arriola ti UST Center for Creative Writing and Literary Studies (Secretary, National Capital Region); Yvonne M. Esperas ti Katig Writers Network (Assistant Secretary, Eastern Visayas); Maria Luna Sicat-Cleto ti Likhaan: Institute of Creative Writing (NCR); Merdeka Morales ti Samahan ng mga Dalubguro sa Filipino ti PUP (NCR); Dr. Priscilla S. Macansantos ti UP Baguio (Cordillera); Niles Jordan D. Breis ti Kabulig Bikol (Southern Luzon); Mary Anne T. Jaro ti University of San Agustin Fray Luis de Leon Creative Writing Institute (Western Visayas); ken Haidee Emmie K. Palapar ti Women in Literary Arts Cebu (Central Visayas).

Agtakem dagiti napili nga opisial ken coordinator iti tallo a tawen wenno manipud iti 2019 agingga iti 2021.


(Naipablaak iti Disiembre 1-15, 2019 a bilang. Para kadagiti kayatna ti ag-subscribe iti kopia ti Bannawag, ag-email iti subscription.mb@gmail.com. Para iti digital a kopia, mapan iti MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)

Panagraira ti ASF, nainget a bambantayan ti DA

Impakaammo ni Agriculture Secretary William Dar a nainget a bambantayan ti Department of Agriculture (DA) ti panagraira ti African Swine Fever (ASF) a nangapektaren iti sumagmamano a pagtaraknan iti baboy iti pito a probinsia iti Luzon.

Mainaig itoy, nangipaulog ti DA-CMTF iti Swine Bulletin No. 12 gapu iti pannakakompiskar dagiti quarantine guards kadagiti naproseso a karne ti baboy a maatap a naimpektaran iti ASF a naibiahe a naipan iti probinsia ti Mindoro.

Naideklarar metten iti state of calamitiy iti 12 a barangay iti Bayambang, Pangasinan gapu iti panagraira iti ASF. Nasuroken a 900 a baboy nga apektado ti naibilin a naikali iti nasao nga ili tapno malapdan ti panagwaras ti nasao nga epidemia.

Kinuna ni Secretary Dar a nasken ti panagtitinnulong dagiti amin a maseknan a gobierno lokal (LGUs), Bureau of Animal Industry (BAI), ken ti National Meat Inspection Service (NMIS) tapno malapdan ti pannagwaras ti sakit a mangkapkapet kadagiti baboy.

“Kiddawentayo kadagiti amin nga agtartaraken iti baboy a didan ilaklako pay dagiti tarakenda a kinapet ti ASF ken dida koma iprosproseso pay ti karne dagitoy tapno di agwaras ti bayrus,” kinuna ni Secretary Dar.

Kinuna pay ti sekretario a napintas nga addang ti panangipaulog ti Malakanyang iti direktiba a nasken a tumulong amin nga ahensia ti turay tapno malapdan ti pangwaras ti sakit.

Kinunana a di masolo a solbaren ti DA ti problema isu a nasken ti pannakikaykaysa dagiti amin nga ahensia a kas koma iti Department of Transportation babaen ti panangtengngelna kadagiti maatap nga impektado a karne iti pannakaibiaheda.

Mainaig itoy, impanamnama ni Secretary Dar a saan a mabaybay-an dagiti agtartaraken iti baboy ta addan inlatang ti gobierno a maitulong kadagiti maapektaran dagiti tarakenda iti nasao a sakit.

Innayonna a kasayaatan a paggatangan dagiti umili iti kasapulanda a karne dagiti aglasat iti NMIS. (Eliseo B. Contillo)


(Naipablaak iti Disiembre 1-15, 2019 a bilang. Para kadagiti kayatna ti ag-subscribe iti kopia ti Bannawag, ag-email iti subscription.mb@gmail.com. Para iti digital a kopia, mapan iti MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)

DISIEMBRE 1-15, 2019

SARITA
2 Ilokano ti Kayat ni Tatang ni Manugang ni Remedios S. Tabelisma S. Aguillon

NOBELA
 8 Angkel Dok (10) ni Dionisio S. Bulong
10 Ti Puga (2) ni Norberto D. Bumanglag, Jr.
14 Awis ti Sierra (25) ni Virginia A. Duldulao

DANIW
23 Panagtaeng ni Alegria Tan Visaya
26 Biag ni Lam-ang ni Pedro Bucaneg
63 Daniw a Para Ubbing ni Ronnie E. Aguinaldo

SALAYSAY
18 Kumsen ti Utek Gapu iti Fast Food? ni Virginia A. Duldulao, Ph.D.
54 Ammuen Dagiti Kangrunaan a Peste Dagiti Nateng ni Reynaldo E. Andres

KOMIKS
40 Miks & Tiks
42 Dagiti Batekan (7) ni Ariel S. Tabag
47 Ickaryz (11) ni Hilario A. Espiritu, Jr.

KOLUM
4 Saludsodem ken ni Apo Hues
6 No Adda Sigsigloten, Adda Met Warwaren
16 Okeyka, Apong
18 Kastoy, Kapid, Ditoy Hawaii
19 Biag ni Ilokano
22 Dear Ikit
25 Dear Doc
39 Haytek!
52 Tips
57 Ading Kosinera

PAGLINGLINGAYAN
60 Showbiz
63 Agkatawa ti Mayat
64 Sinniriban
64 Sapukas-2
64 Sudoku

DADDUMA PAY
5 Ni Rio, ti Bannuar nga Aso
12 Netizone
17 Siled ti Kararag
24 Idi Un-unana a Panawen
38 Apay a Napateg a Yadal ti Kultura Kadagiti Ubbing?
53 Ti Tarakenmo ken Sika
56 Panangimaton iti Pagtaengan
58 Ammuem Pay Dagitoy
59 Ti Gasatmo
62 Manipud iti Social Media


(Para kadagiti kayatna ti ag-subscribe iti kopia ti Bannawag, ag-email iti subscription.mb@gmail.com. Para iti digital a kopia, mapan iti MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.) 

Kasano ti Agidatag iti Sinurat iti Bannawag?

Amin nga idatag a sinurat, nasken a naisurat iti Ilokano ken saan pay a naipablaak. Makiddaw kadagiti agidatag a basaenda dagiti kaudian a bilang ti Bannawag tapno maadalda no ania dagiti sinurat a maipabpablaak iti Bannawag ken no ania ti ortograpia (ispeling dagiti balikas) nga ar-aramaten ti Bannawag.

Nasken met a may-email dagiti sinurat iti daytoy nga adres: bannawagmagazine.mb@gmail.com.

Dagiti sarita, maidatag iti Literary Editor (ilanad iti Subject ti email ti: Para iti Literary Editor; dagiti daniw, maidatag met iti Poetry Editor (ilanad iti Subject ti email ti: Para iti Poetry Editor). Kadagiti agdadamo a mannurat, maibalakad a di koma nakurkurang ngem tallo a daniw ti ipatulod.

Agawat pay ti Bannawag kadagiti sinurat a para kadagitoy a seksion: “Adda Latta Naasi a Tattao,” “Ti Padas a Diakto Malipatan,” “Ti Makunami,” “Personal a Salaysay,” “Sidingan a Dapan,” ken kadagiti dadduma pay a seksion a maluktan, no addanto man. No kasapulan, mairekomendar met a mapakuyogan dagiti idatag a sinurat iti/kadagiti retrato a mainaig iti sinurat ken may-email daytoy/dagitoy iti sabali a file iti JPG format. Idatag met dagitoy iti Editor (ilanad iti Subject ti email ti: Para iti Editor).

Gagangay a dagiti salaysay a maipabpablaak iti Bannawag, nakiddaw, no di man insingasing dagitoy dagiti beterano a mannurat.

Nupay kasta, agawat latta met ti magasin kadagiti di makiddaw a salaysay ken dadduma pay a sinurat a pakairamanan dagiti sarita ken daniw, ngem saan a responsibilidad ti magasin ti mangilawlawag no apay a di mabalin a maipablaak dagitoy no bilang di makapatar dagitoy iti pagrukodan dagiti maseknan nga editor.

No mabalin nga ipablaak ti sinurat, makaawat ti autor iti pakaammo manipud iti magasin nga interesado daytoy a mangipablaak iti gapuananna. No awan ti maawatna a pakaammo iti di nakurkurang ngem tallo a bulan, mabalinnan a kunaen a saan a naaprobaran ti sinuratna.

'Bikescouts'

‘BIKESCOUTS.’ Bayat ti panangunorda iti national highway, no kua, piduten dagitoy 'bikescouts' a kameng ti Pagudpud Bike Bros. Unltd. dagiti naiwarang a plastik iti abaga ti kalsada. Tunggal Sabado nga isayangkat ti grupo ti adbokasiada a “Keeping The Roadside Clean” bayat ti panagbisikletada manipud iti Barangay Tarrag (masungad a barangay ti Pagudpud, Ilocos Norte) nga agpatingga iti Patapat viaduct. (HILARIO A. ESPIRITU, JR.)


(Naipablaak iti Nobiembre 16-30, 2019 a bilang. Para kadagiti kayatna ti ag-subscribe iti kopia ti Bannawag, ag-email iti subscription.mb@gmail.com. Para iti digital a kopia, mapan iti MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)

Dap-ayan 2020 ti GUMIL Filipinas, sangailien ti GUMIL Ilocos Norte

Angayen ti GUMIL Filipinas (Gunglo Dagiti Mannurat nga Ilokano iti Filipinas ken iti Ballasiw-Taaw) ti Dap-ayan 2020 wenno ti tinawen a kombension ken literary seminar ti gunglo inton Abril 17-19, 2020 iti Subli-Subli Resort iti Currimao, Ilocos Norte, babaen ti panangsangaili ti GUMIL Ilocos Norte (Gunglo Dagiti Mannurat nga Ilokano iti Ilocos Norte) nga idauluan ni Reynaldo E. Andres, mannurat ti Bannawag.

Daytoy ti napagnunumuan iti miting dagiti opisial ti GF nga idauluan ni Presidente Remy N. Albano a naangay idi Oktubre 20 iti Senior Citizens Hall iti Naguilian, La Union iti panangsangali ni Ret. RTC Judge Joven F. Costales, kolumnista ti Bannawag.

Panggep ti tinawen a kombension ti pannakaisayangkat dagiti lektiur ken workshop iti panagsurat iti daniw, piksion, ken salaysay kadagiti mannurat a kameng ti GUMIL, dagiti mannursuro, estudiante ken asino man nga interesado nga agadal nga agsurat. Mainayon iti lektiur dagiti maidatag a sukisok a mainaig iti kultura, pakasaritaan wenno pagsasao nga Ilokano manipud kadagiti research paper kadagiti unibersidad.

Paset pay ti pasken ti pannakarambak ti maika-52 a tawen ti GUMIL babaen ti espesial a programa a para iti cultural presentation, pannakapadayaw dagiti nangabak kadagiti salip iti panagsurat, pannakaipaay ti Bucaneg ken Florentino Awards, ken pannakayalnag dagiti libro iti Ilokano a sinurat dagiti  kameng ti gunglo.

Masingir kadagiti amin nga agatendar ti P1,500 a registration fee a para iti akomodasion ken makan iti tallo nga aldaw a pasken ken seminar kit. Kadagiti interesado nga agatendar, makiuman kadagiti provincial chapter iti lugaryo, wenno agsurat iti email nmevaldez@gmail.com. Maibalakad met ti panangbisita iti FB page ti GUMIL Filipinas para kadagiti sumarsaruno a pakaammo mainaig iti daytoy. (NMEV)


(Naipablaak iti Bannawag iti Nobiembre 16-30, 2019 a bilang. Para kadagiti kayatna ti ag-subscribe iti kopia ti Bannawag, ag-email iti subscription.mb@gmail.com. Para iti digital a kopia, mapan iti MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)