Tarabay iti Ortograpia ti Pagsasao nga Ilokano, imalditton ti DepEd

Tapno maaddaan dagiti mannursuro iti maymaysa ken nalawag a giya (guide) iti panangisuro, isagsaganan ti Departamento ti Edukasion (DepEd) ti Tarabay iti Panangisuro iti Ilokano a nakaipalaonan ti Ortograpia ti Pagsasao nga Ilokano.

Maysa ti DepEd Ortograpia ti Pagsasao nga Ilokano kadagiti ortograpia dagiti 19 a pagsasao a mausar iti Mother Tongue Based-Multilingual Education (MTB-MLE) a naidalus iti naangay a Writeshop on the Finalization of Primer Booklet, Teachers’ Resource Book and Formative Assessment iti Ann Raquel’s Resort, Olongapo City, idi Septiembre 16-20.

Mainaig iti daytoy a pannakaidalus ti DepEd Tarabay iti Pagsasao nga Ilokano, impeksa ni Dr. Rosalina J. Villaneza, hepe ti Teaching-Learning Division-Bureau of Learning Delivery, ti panangbigbigna iti nabayagen a tradision ti Ortograpia ti Ilokano a kas us-usaren dagiti mannurat, iskolar ken agsuksukisok.

“Masapul a bigbigentayo daytoy nga ortograpia dagiti mannurat nga Ilokano ta ar-aramatendan dayta sakbay pay ti MTB-MLE,” impaganetget ni Villaneza.

Innayonna a naglasaten daytoy iti naunday a panawen ti pannakasubok ket saan a kas karina nga iwalin lattan daytoy.

Malaksid iti Ortograpia, naipalaon met iti Tarabay iti Panangisuro iti Ilokano ti Pagannurotan iti Gramatika Ilokana ken ti Glosario dagiti Balikas.

Nairaman met a naidalus iti nasao a workshop ti Umuna nga Addang iti Panagbasa (Ilokano Primer), Pagsanayan iti Panagbasa (Formative Assessment) ken ti Tarabay ti Mannursuro (Teacher’s Guide).

Manamnama a maimaldit iti kabiitan a panawen dagitoy a libro tapno ad-adda pay a malawlawagan dagiti mannursuro ken mapadaras ti panagsursuro dagiti ubbing iti bukodda a pagsasao.

Bayat met a maur-uray ti pannakaimaldit dagitoy a libro, kinuna ni Mr. Reyangie Sandoval ti Bureau of Learning Resources a mabalin a y-upload dagitoy iti learning resource management development system (LRMDS), ti website a pakaipempenan dagiti elektroniko a ramit a pangisuro ti DepEd. (Joel B. Manuel)


(Naipablaak iti Oktubre 16-31, 2019 a bilang ti Bannawag. Para kadagiti kayatna ti ag-subscribe iti kopia ti Bannawag, ag-email iti subscription.mb@gmail.com. Para iti digital a kopia, mapan iti MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)