NSCC ti Ilocos Sur, immawat iti ayuda iti DA

Kinaragup ni Agriculture Sec. William Dar dagiti dadaulo ti probinsia ti Ilocos Sur nga ipanguluan da Gov. Ryan Singson ken Deputy Speaker Deogracias Savellano, dagiti opisial ti NSCC, ken dagiti mannalon iti probinsia kalpasan ti pannakayawat dagiti makinaria iti NSCC Demo Farm, Caoayan, Ilocos Sur idi Septiembre 26, 2019.

Kas panangpaneknek ni Agriculture Secretary William Dar a dina baybay-an dagiti mannalon, nakikammayet ti Department of  Agriculture (DA) kadagiti nadumaduma a kooperatiba iti pagilian tapno maidalan kadagitoy dagiti tulong a maipaay kadagiti mannalon.

Idi Septiembre 26, 2019, personal a pinasiar ni Sekretario Dar ti Nueva Segovia Consortium of Cooperatives (NSCC) a masarakan ti opisinana iti Caoayan, Ilocos Sur, tapno yawatna dagiti nadumaduma a makinaria nga agpateg iti P36.5-milion. Ti NSCC ti maysa kadagiti kadakkelan a cooperative consortium iti pagilian ken addaanen iti binilbilion nga asset.

Babaen ti simple a seremonia a naangay iti NSCC Farm nga inatendaran ni Sekretario Dar ken dagiti opisial ti probinsia iti panangidaulo ni Gob. Ryan Singson ken Dip. Deogracias Savellano, naiwaras dagiti makinaria ken ramit a maaramat dagiti mannalon tapno ad-adda pay a mapaaduda ti apitda ken maipababada ti magastosda nga agtalon. Maaramat pay dagiti mannalon dagiti nasao a makinaria a para iti post-production, panagproseso, ken iti panangilakoda kadagiti produktoda.

Mairaman kadagiti makinaria a naited iti NSCC ti mobile re-circulating dryer, compact rice mill, four wheel drive tractor with levee maker, combined harvested with baler, riding transplanter, hauling truck, ken pagaramid iti organiko a ganagan.

Kas kinuna ni Dr. Divina Quemi, Chief Executive Officer ti NSCC, malaksid kadagiti naited a makinaria, immunan nga immawat ti consortium iti  P150-milion nga ayuda manipud met laeng ken ni Seretario Dar iti immuna nga ibibisita daytoy iti NSCC idi Agosto. (Eliseo B. Contillo)


(Naipablaak iti Nobiembre 1-15, 2019 a bilang. Para kadagiti kayatna ti ag-subscribe iti kopia ti Bannawag, ag-email iti subscription.mb@gmail.com. Para iti digital a kopia, mapan iti MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)