Maika-5 a Salip iti Daniw ti Saniata Prize

Ipakaammo ti Secretariat ti Saniata Prize a silulukaten ti maika-5 a pasalipna iti daniw.

Panggep ti Saniata Prize ti agbalin a maysa kadagiti paratignay dagiti mannaniw nga Ilokano nga agparnuay kadagiti baro a langa ti daniw nga Ilokano bayat met ti panagbigbigda kadagiti kannawidan a porma ti daniw nga Ilokano.

Isponsoran ti Saniata Publications ken ti Pamilia Tabag, tinawen daytoy a pasalip a narugian idi 2015. Maipaayan iti pammadayaw a Hall of Fame ti makayalat iti tallo nga Umuna a Gunggona. Ni premiado a mannaniw Daniel L. Nesperos ti kaunaan ken kakaisuna pay laeng a Hall of Fame ti Saniata Prize.

Dagiti pagalagadan:

1. Maysa a daniw laeng ti idatag. Saan a makedngan ti tema, porma wenno kaatiddog ti isalip a daniw.

2. Masapul nga orihinal, di pay naipablaak, ken naasken a nakasurat iti lengguahe nga Ilokano ken di naipatarus manipud iti sabali a lengguahe ti isalip a daniw. No matakuatan a nabalusingsing daytoy a pagannurotan, maibabawi ti gunggona ket maparitanto metten a makisalip ti autor iti ania man a pasalip ti Saniata Prize.

3. Naluktan ti salip iti Hulio 22, 2019 ket agpatingga iti Oktubre 4, 2019. Ipatulod babaen ti e-mail ti pakisalip iti asseng.tabag@gmail.com iti subject a “5th Saniata Prize.”

4. Masapul nga agusar iti nagan iti pluma (pen name) ti mannaniw. Iraman ketdi iti email ti kompleto a nagan, numero ti selpon, ken adres ti pagtaengan wenno opisina.

5. Dagiti premio: 1st Prize: Php2,500.00; 2nd Prize: Php 2,000; 3rd Prize: Php1,500.00.

6. Mapadayawanto dagiti mangabak iti anibersario ti GUMIL Metro Manila iti Disiembre 2019 wenno iti okasion nga angayen ti isponsor ti Saniata Prize.

7. Makipagtagikua ti Saniata Prize kadagiti mangabak a daniw ket awan sungsungbatanna kadagiti mannaniw no bilang usarenna dagitoy iti ania man a wagas a kas iti pannakaipabuya, pannakaipablaak iti magasin wenno libro, ken pannakaipaskil iti social media. Agtalinaed ketdi ti copyright iti autor wenno mannaniw.


(Naipablaak iti Hulio 16-31 a bilang. Para kadagiti kayatna ti ag-subscribe iti kopia ti Bannawag, ag-email iti subscription.mb@gmail.com. Para iti digital a kopia, mapan iti MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)