Dinutokan ni Pres. Rodrigo Duterte ni Dr. William Dar a sekretario ti Department of Agriculture (DA) a kas sukat ni Emmanuel Piñol a nayakar a mangidaulo iti Mindanao Development Authority.
Patneng nga Ilokano ken tubo ti Brgy. Danuman, Sta. Maria, Ilocos Sur, immuna a nagpaay ni Dr. Dar a sekretario ti DA ken presidential adviser on rural development idi panawen ni Presidente Joseph Estrada. Mabigbig ni Dr. Dar gapu iti dakkel a kontribusionna iti pannakapadur-as ti sektor ti agrikultura saan laeng nga iti pagilian no di pay ket iti sangalubongan.
Ni Dr. Dar ti presidente ti Inang lupa Movement, maysa a tignay a mangipangruna iti panangbirok kadagiti solusion a mangrisut iti parikut iti kinakurapay, pannakaipanamnama ti kaadda ti umdas a taraon iti pagilian, ken pannakapadur-as ti ekonomia. Nagpaay pay a kas Strategic Adviser for Global Expansion of Prasad Seeds.
Mabigbig ti kabaelanna iti benneg ti agrikultura, nagpaay ni Dr. Dar nga executive director ti Philippine Council for Agriculture, Aquatic and Natural Resources Research and Development (PCAARRD). Kalpasanna, indauluanna iti uneg ti 15 a tawen, kas kakaisuna a Filipino a director-general ti International Crops Research Institute for the Semi-Arid Tropics (ICRISAT), maysa nga international organization nga adda iti babaen ti Consultative Group on International Agricultural Research (CGIAR) a nakabase idiay India.
Ti ICRISAT ti mangidadaulo iti pannakaiwayat iti agricultural research for rural development.
Kas eksperto iti agrikultura, inggubet ni Dr. Dar ti bagina iti naunday a panawen iti research and development. Nagpaay pay a kas kaunaan a direktor ti Bureau of Agricultural Research idi 1988.
Iti panagtugawna a kas sekretario ti DA, kinuna ni Dr. Dar a dakkel ti namnama iti pannakapadur-as ti agrikultura babaen ti pannakaiwayat dagiti nadumaduma a solusion a kas iti technology and innovation, agri-preneurship, export markets, ken iti panangiraman kadagiti agtutubo a tumulong tapno ad-adda pay nga agbalin a produktibo ken mapagtalinaed ti pannakaital-o ti sektor ti agrikultura.
Kinuna ni Sek. Dar a babaen ti panangsurot iti walo a modelo iti panangpasayaat iti sektor ti agrikultura, dakkel ti namnama a naparpardas ti pannakapadur-as ti biag dagiti mannalon iti entero a pagilian.
Dagitoy ti inawagan ni Sek. Dar iti “eight paradigms” a mangbukel iti kunana a “New Thinking for Agriculture”: modernisasion ti agrikultura, industrialisasion ti agrikultura, pannakatandudo ti panaglako iti produkto iti ballasiw-taaw, konsolidasion dagiti talon, road map development, pannakaidur-as ti impraestruktura, pannakailatang ti dakdakkel a badiet ken puonan a para iti agrikultura, ken suporta ti lehislatura.
Kas pammigbig iti naisangsangayan a kabaelanna, naipaayanen iti walo a doctorate degrees (honoris causa) babaen dagiti nadumaduma a kolehio ken unibersidad (SUCs) iti pagilian. Idi 1988, napadayawan a kas maysa kadagiti Ten Outstanding Young Men (TOYM) ti Filipinas, ken naipaayan pay iti Outstanding Administrator Award manipud iti DOST. Impaayan met ti India iti Outstanding MS Swaminathan Leadership Award ken iti dayta met laeng a tawen, naited kenkuana ti Pamana ng Pilipino Award babaen ken ni Presidente Benigno Aquino III.
Patanor ti dati nga Ilocos Sur Agricultural College, ken ti Benguet State University, inleppas ni Dr. Dar ti doktoradona iti Pilosopia iti University of the Philippines. (Eliseo B. Contillo)
(Naipablaak iti Agosto 16-31, 2019 a bilang ti Bannawag. Para kadagiti kayatna ti ag-subscribe iti kopia ti Bannawag, ag-email iti subscription.mb@gmail.com. Para iti digital a kopia, mapan iti MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)
No comments:
Post a Comment