Pedrera, umuna iti 3rd Albalos Awards

Inyalat ni Isaac R. Pedrera ti Umuna a Gunggona iti Salip iti Sarita ti 3rd Mario Abinsay Albalos Foundation Literary Awards a naluktan para kadagiti amin a mannurat iti Ilokano idi Abril 21 itay napan a tawen ken naggibus idi Enero 31 itoy a tawen.

Pinangabak ni Pedrera, tubo iti Tangaoan, Piddig, Ilocos Norte ti saritana a “Ti Naembargo a Daga iti Cagat.” Nangisursuro ni Pedrera iti Sarrat National High School sakbay a nagtrabaho a kas Pharmacy Technician iti JFK Medical Center, Edison, New Jersey a nagretiruanna.

Dagiti kakadua ni Apo Pedrera a nangabak:

Maikadua a Gunggona, Arnold Pascual Jose, dati nga empleado ti Liwayway Publishing, Inc., ken tubo iti Bacsil Norte, Siudad ti Laoag ngem agindegen iti Wahiawa, Hawaii,  babaen ti saritana a “Ni Lakay Gapit a Bayog;”

Maikatlo, Virgilio S. Naungayan, retirado a mannursuro a tubo iti Darapidap, Candon City (Ilocos Sur), babaen ti saritana a “The Walking Dead.”

Naangay ti pasalip iti babaen ti foundation a naipanagan iti daydi Dios-ti-aluadna a mannurat ti Bannawag Mario A. Albalos, tubo iti Cabaroan Daya, Siudad ti Vigan, napadayawan a Pedro Bukaneg awardee ken umuna a Thomas Jefferson awardee iti Estado ti Hawaii a nagnanaedanna agingga iti pimmusay idi Marso 3, 1991 iti edadna a 40.

Is-isponsoran ni Jenny Alcausin (agnanaed iti California) ti nasao a pasalip iti pannarabay dagiti gagayyem daydi MAA a da Jun Abinsay ken Priscilla Dela Cruz (agpada nga agnanaed iti Hawaii) ken dagiti kameng ti Bannawag.

Dagiti gunggona: Umuna, P15,000.00; Maikadua, P12,00.00; ken Maikatlo, P10,000.00. Maipaayan pay dagiti mangabak iti sertipiko ti pammadayaw malaksid iti medalion a maipaay iti nangyalat iti Umuna a Gunggona.

Mapadayawan dagiti mangabak bayat ti Dap-ayan 2019 ti GUMIL Filipinas a maangay itoy nga Abril 26-28, 2019 iti Apayao Agri-Tourism & Sports Complex, San Gregorio, Luna, Apayao.

Dagiti naghurado: Neyo Mario E. Valdez, pangulo; Juan Al. Asuncion, kameng; ken Ariel S. Tabag, kameng.


(Naipablaak iti Marso 25, 2019 a bilang. Para kadagiti kayatna ti ag-subscribe iti kopia ti Bannawag, ag-e-mail iti subscription.mb@gmail.com. Para iti digital a kopia, mapan iti MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)