Gorospe, kakaisuna a nangabak iti Salip iti Sarita ti 21st AMMAFLA

Fr. Gorospe

Inkeddeng ti hunta dagiti hurado ti Salip iti Sarita ti 21st AMMA Foundation Literary Awards a maysa laeng ti mapadayawan a mannurat itoy nga edision ti salip babaen ti pannakaited iti nasao a mannurat ti Naisangsangayan a Gunggona (Special Prize).

Maipaay ti Special Prize ken ni Fr. Franklin D. Gorospe, tubo iti Centro, Lasam, Cagayan, babaen ti saritana a “Ti Nakali a Gameng ni Father Ambrose.”

Agpapaay iti agdama ni Fr. Gorospe nga in-house Oeconomus (Treasurer) ken Human Resource Manager ti Diosesis ti Laoag. Sakbayna, nagpaay a moderator ti Team Ministry iti Immaculate Conception Parish ti Siudad ti Batac, parish priest ti St. Jude Catholic Parish ti Pagudpud, I.N., parish administrator ti Our Mother of Perpetual Help Quasi-Parish iti Pancian, Pagudpud, I.N., parish priest ti St. Gabriel the Archangel Parish, Nueva Era, I.N., ken asst. parish priest ti Our Lady of Lourdes Parish, Mangato, Laoag City, bayat met laeng ti panagpaayna a part-time oeconomus no di man oeconomus ti Diosesis ti Laoag.

Mapadayawan ni Fr. Gorospe bayat ti Dap-ayan 2019 ti GUMIL Filipinas (Gunglo Dagiti Mannurat nga Ilokano iti Filipinas ken iti ballasiw-taaw) a maangay itoy nga Abril 26-28, 2019 iti Apayao Agri-Tourism & Sports Complex, San Gregorio, Luna, Apayao.

Dagiti naghurado: Juan Al. Asuncion, pangulo; Ariel S. Tabag, kameng; ken Aileen R. Rambaud, kameng.

Dagiti mangimaton iti AMMAFLA: Amado ken Gloria Yoro, Francisco ken Aurora Ponce, ken Alfredo ken Cherry Quibol (agpapada nga agindegen iti Hawaii).


(Naipablaak iti Abril 1, 2019 a bilang. Para kadagiti kayatna ti ag-subscribe iti kopia ti Bannawag, ag-email iti subscription.mb@gmail.com. Para iti digital a kopia, mapan iti MAGZTER wenno PRESS READER ket sapulen ti Bannawag. Laglagipenyo koma, kakailian, nga i-like daytoy FB Page ti Bannawag Magazine. Dios ti agngina.)