PANAGBALLASIW ITI KARAYAN CAGAYAN. Dagiti pasahero manipud iti Barangay Abolo ken kadagiti kaparangetna a barangay ti Amulung, Cagayan nga aglugan iti barangay a kukua ti munisipio. Agbiahe daytoy a barangay a mangballasiw iti Karayan Cagayan a mapan iti Barangay Anquiray, barangay ti Amulung a bineltak ti Kalsada Nasional. Iti agsapa, alas sais agingga iti alas siete nga agbiahe ti barangay. Dakkel a tulong daytoy kadagiti estudiante nga adda iti ballasiw ti karayan a sumrek iti Amulung National High School ken dagiti agudong nupay sangapulo a pisos ti plete ti maysa a pasahero. Pitopulo a pisos met ti plete ti mailugan a motorsiklo. Iti malem, manipud iti alas singko agingga iti alas sais ti biahe ti barangay. Agingga laeng iti duapulo a pasahero ti kargaen ti barangay. No adda karga a motorsiklo, makissayan ti bilang dagiti pasahero. (Rinetrato ni Dexter Marin Fabito/ Teksto ni Jonathan P. Ibale)
(Naipablaak iti Bannawag iti Hunio 11, 2018 a bilang.)
No comments:
Post a Comment