Nayon a pempen a bagas ti Filipinas, sumangpet iti mabiit

Sumangpet iti mabiit ti ag-250,000 tonelada metrika a bagas nga inangkat ti National Food Authority (NFA).

Aggapu dagiti bagas iti lima a supplier manipud iti Thailand ken Singapore, a maibatay iti kontrata, lakuanda ti Filipinas iti 250,000 tonelada metrika a bagas.

Dagitoy baro nga stock ti agpaay a pempen ti NFA para kadagiti karigatna a bulan— manipud iti Hulio agingga iti Septiembre.

Manamnama a maisangpet iti pagilian ti dakkel a paset daytoy nga aganay iti 200,000 MT iti di naladladaw ngem iti Hulio 31, 2018. Ti nabati a 50,000 MT, maideliber iti di naladladaw ngem iti Agosto 31, 2018.

Mabingaybingay dagiti nasao a bagas iti sibubukel a pagilian (Luzon, Visayas ken Mindanao) tapno maiwaras kadagiti merkado wenno kadagiti target a benepisiario.


(Naipablaak iti Hunio 18, 2018 a bilang.)