Maangay ti reorganizational meeting ti GUMIL Benguet babaen ti panangilungalong ti Hunta Direktiba ti GUMIL Filipinas inton Hunio 9, 2 P.M., iti #18 Malaya Rd., Dominican Hill Extension, Baguio City, babaen ti panangsangaili ni Luvimin Aquino, nalatak a scriptwriter dagiti drama nga Ilokano iti radio.
Kas kuna ni Aquino, holdover president ti GUMIL Benguet, maawis amin dagiti dati nga opisial ken dagiti regular a miembro ti GUMIL Benguet, ken uray dagiti mannurat wenno agregget nga agsurat a di pay nakapagkameng nga agnaed wenno adda dagiti pagsapulanda iti Benguet ken Siudad ti Baguio. Kalpasan ti miting, mabotosanto ti baro a grupo dagiti opisial ti GUMIL Benguet nga agtakem iti makatawen.
Sakbay ti reorganizational meeting, maangay met ti maika-5 a Board Meeting ti GUMIL Filipinas, babaen ti panangidaulo ni Vilmer V. Viloria, a mangrugi iti alas 10:00 iti bigat iti isu met laeng a venue.
Para iti ad-adu pay nga impormasion, mabalin a kontaken dagiti sumaganad: Neyo E. Valdez (0977-1417901) ken Luvimin Aquino (0997-1456671). (NMEV)
(Naipablaak iti Bannawag iti Mayo 21, 2018 a bilang.)
No comments:
Post a Comment