Impalagip ti Department of Education (DepEd) a maipakat latta ti annuroten a “no collection” iti panagpalista dagiti agad-adal kadagiti eskuela iti elementaria ken hayskul ti gobierno ken ginutigotda dagiti nagannak ken maseknan nga ipulongda kadagiti autoridad dagiti aglabsing a para publiko nga eskuela.
Kinuna ni Education Secretary Leonor Briones a saanda nga agsingir kadagiti “inkapilitan” a kontribusion kadagiti estudiante nangruna iti tiempo ti panageenrol.
Innayonna a sipipinget ti DepEd a mangipatungpal iti panggep ti gobierno a mangipaay kadagiti amin nga estudiante a Filipinon iti libre nga edukasion iti elementaria ken sekundaria.
Maibatay iti “No Collection” Policy, saanen nga agbalin a pagparikutan dagiti nagannak ken estudiante dagiti kontribusion ta bigbigen ti DepEd nga adu dagiti paggastuan a masapul nga ibaklay dagiti nagannak tapno laeng makapagbasa dagiti annakda.
Aglukat ti klase kadagiti para publiko nga eskuela iti daytoy Hunio 4. Iti rekord ti DepEd, mapattapatta a 28-milion nga estudiante iti para publiko ken pribado nga eskuela ti manamnama nga agsubli kadagiti pagadalanda para iti School Year (SY) 2018-2019.
(Naipablaak iti Hunio 4, 2018 a bilang.)
No comments:
Post a Comment