Ti Filipinas ti maikatlo a karagsakan a pagilian iti lubong iti 2017, kas ipakita ti surbey ti Gallup International Association (GIA).
Naduktalan ti 41st Annual Global End of the Year Survey ti Gallup International a 86 a porsiento kadagiti Filipino ti agkuna a naragsakda kontra iti dua a porsiento laeng a kimmontra wenno addaan iti iskor a +84. Sangapulo porsiento met ti saan a makaikeddeng no naragsak wenno saanda a naragsak.
Kas reaksion iti resulta ti surbey, kinuna ni Presidential Communications Secretary Martin Andanar a siguraduen ti administrasion ni Duterte nga umad-adunto pay dagiti makita a rason tapno ibaga dagiti Filipino a naragsakda.
Kinuna ni Andanar a kadagiti umay a bulan ken tawen, determinado ti administrasion a mangipaay kadagiti napatpatak a pundasion ti kinaragsak babaen ti nadur-as nga ekonomia, epektibo a panagituray, ken agtultuloy a panagari ti kappia ken hustisia.
Idi 2016, nagtabla ti Filipinas ken China iti maikadua a puesto iti iskor a +79.
Iti 2017, ti manen Fiji (+92) ti karagsakan a lugar iti lubong, manipud iti 55 a pagilian a nasurbey. Ti met Colombia (+87) ti maikadua.
Dadduma pay a karaman iti Top 10 a kararagsakan a pagilian: Mexico (+82); Vietnam (+77); Kazakhstan (+74); Papua New Guinea (+74); Indonesia (+68); India (+64); Argentina ken ti Netherlands (+64).
Iti sabali a bangir, sinukatan ti Iran ti Iraq a kas kalidayan a pagilian iti lubong iti 2017 iti babaen ti iskor a +5.
Mapan a 53,769 a tattao iti lubong ti nainterbiu. Tunggal pagilian, mapan a 1,000 a babai ken lallaki ti nausar a sampol a nainterbiu babaen ti rupanrupa ken telepono wenno online.
(Naipablaak iti Enero 15, 2018 a bilang.)
No comments:
Post a Comment