Kalpasan ti pannakasarabo ti baro a tawen, impakaammo ni Department of Health (DOH) Secretary Francisco Duque III a panggep ti departamentoda nga irekomendar ken ni Presidente Rodrigo Duterte nga ibilin daytoy ti mamimpinsan a pannakaiparit ti panagusar iti palpalibang (rebentador ken kapadana) iti pagilian.
Kinuna ni Duque a ti panangpirma ni Duterte iti Executive Order No. 28 a mangiparit kadagiti palpalibang kadagiti pribado a residensia ken pannakaipalubos laeng daytoy kadagiti naikeddeng a lugar ket maysa nga addang a mabalin a mangitunda iti pannakaiparit a mamimpinsan dagiti palpalibang.
Nupay kasta, kuna ni Duque a maawatan la ketdi ti Presidente ti epekto daytoy iti biang dagiti aglaklako iti palpalibang. No bilang ta maipakat ti mamimpinsan a pannakaiparit ti palpalibang, masapul a mangidiaya ti DOH ken ti Department of Labor and Employment iti alternatibo a pamastrekan dagiti agar-aramid ken aglaklako kadagiti palpalibang.
Manipud iti Disiembre 21, 2017 agingga iti Enero 1, 2018, nakairekord ti DOH iti 191 a kaso ti pannakadunor mainaig iti palpalibang, a kaaduan kadagitoy ti adda iti National Capital Region. Basbassit ketdi daytoy a bilang no idilig kadagiti nadangran kadagiti napalpalabas a tawen.
(Naipablaak iti Enero 15, 2018 a bilang.)
No comments:
Post a Comment