Manipud iti DOH: 6 a tips tapno maliklikan ti bird flu

Iti panagraira itay nabiit ti avian influenza wenno bird flu kadagiti ili ti Pampanga ken Nueva Ecija, ginutigot ti gobierno ti panagtalinaed a kalmado ti publiko.

Kas kuna da Secretary Paulyn Ubial ken spokesperson Eric Tayag ti Department of Health (DOH), awan met ti naireport a kaso ti bird flu kadagiti tattao.

Nupay kasta, nangyetnag ti nasao a departamento kadagiti tarabay iti panangliklik iti panagrairar ti bird flu, a manamnama a mangapektar iti sektor ti agrikultura iti maikatlo a quarter ti tawen.

Adtoy dagiti tips ti DOH kontra iti bird flu:

1. Liklikan ti umasideg kadagiti naimpektaran a fowl (manok, pato, ken kapadada). Dagiti fowl ti kangrunaan a paggapuan ti avian influenza isu a masapul a liklikan.

2. Kanayon nga agbuggo iti ima. Napateg ti umno a panagbuggo iti ima tapno maliklikan ti ania man a kita ti impeksion a pakairamanan ti bird flu.

3. Lutuen a nasayaat ti karne ti manok. Natalged latta ti agsida iti karne ti manok ken dadduma pay a produkto manipud iti poltri. Ngem masapul laeng a maluto dagitoy a nasayaat.

4. Masapul nga umno ti aruaten dagiti tumulong iti panangidalimanek kadagiti naimpektaran. Masapul met nga ammuen ti ania man a pagilasinan iti sakit kas iti gurigor, panagpaparaw, wenno uyek. No bilang ta masakit, takkuban ti agong ken ngiwat iti face mask, sa mapan agpakita iti klinika wenno ospital.

5. Dalusan dagiti personal a ramit a pangsalaknib iti bagi. Gapu iti panaglalaok dagiti tattao, masapul a dalusan dagiti bukod a ramit. Nalaka laeng met ti mangaramid iti pagdalus: paglaoken laeng ti maysa a paset ti bleach (Chlorox) ken 99 a paset ti danum, kas koma 1 a kutsara a bleach a mainawnaw iti 99 a kutsara a danum. Masapul met a saan a mairuar iti farm dagiti ramit.

6. Ireport dagiti saan a kadawyan nga ipapatay dagiti taraken iti pagtaraknan iti manok. Nasken daytoy tapno iti kasta, marugian ti Department of Agriculture (DA) ti proseso ti panangkontrol ken pananglapped iti mabalin a panagraira ti sakit.


(Naipablaak iti Bannawag, Septiembre 11, 2017 a bilang.)