Nakurapay a pamilia, ilislista ita ti DSWD

Madama nga ilislista ti Department of Social Welfare and Development (DSWD) no asino dagiti nakurapay a pamilia iti sapasap a pagilian.

Daytoy ti maikadua a panangiwayat ti DSWD iti panagilista iti babaen ti National Household Targeting System for Poverty Reduction (NHTS-PR) wenno “Listahanan” nga agpanggep a mangammo no asino dagiti nakurapay a Filipino.

Adda dagiti imbaon ti DSWS a field staff members nga agurnong iti datos manipud kadagiti amin nga agindeg kadagiti barangay kadagiti probinsia ket kidkiddawen ti DSWD ti pannakaited koma kadagiti field staff members dagiti umisu a sungbat kadagiti saludsodda.

Kuna ti DSWD a mausarto dagiti datos a maukkon iti pannakaitudo dagiti pamilia a rumbeng a maipaayan iti tulong wenno serbisio manipud iti gobierno.

Iti agdama, kuna ti DSWD a nakaipatuloden iti nasurok a 20,000 a field staff members nga agukkon iti datos ken maisagsagana ti pannakaipatulod ti nayon a 27,000 a field staff members tapno makompleto ti pannakaamiris ti kasasaad ti mapan a 15.3 a milion a pamilia iti uneg ti 11 a bulan.

Kadagiti dadakkel nga ili ken siudad, naibilin laeng kadagiti field workers ti panagukkonda kadagiti datos kadagiti pagdudupudopan dagiti nakurapay.

Idi 2009, inangay ti DSWD ti umuna nga assessment kadagiti nakurapay a kaamaan, a nakaituduan ti mapan a 3.2-milion a nakurapay a kaamaan manipud iti 10.9-milion a kaamaan a napagsaludsodan.


(Naipablaak iti Bannawag, Hunio 15, 2015 a bilang.)