Japan, mangidiaya iti 400 a trabaho para kadagiti medical worker a Filipino

Mapan a 400 a trabaho ti naluktan para kadagiti medical worker a Filipino a kayatna ti agtrabaho idiay Japan, kas kuna ti Philippine Overseas Employment Administration (POEA).

Iti maysa a job advisory, kuna ti POEA a madama ti panagala ti Japan International Corporation of Welfare Services (JICWELS) iti 75 a nurse ken 300 a careworker, a maiwaras kadagiti medical facility iti Japan.

Segun iti JICWELS, dagiti nurse nga interesado nga agaplay, masapul a nakapasa iti licensure exam, ken nasuroken a tallo a tawen nga agtrabtrabaho iti ospital.

Para kadagiti careworker, masapul a nagturpos dagiti aplikante iti maysa nga uppat-a-tawen a kurso a mainaig iti siensia (science-related), kas iti nursing ken sabsabali pay a kapada daytoy, ken addaan iti umisu a sertipikasion manipud iti Technological Education Skills Development Authority (TESDA).

Masapul a nasalun-at ti bagi ken panunot dagiti aplikante ken agtawen iti 20 agingga iti 35.

Ibalakad ti POEA kadagiti aplikante nga agparehistroda nga umuna iti online iti www.eregister.poea.gov.ph.

Innayon ti POEA a nasken a maawat dagiti aplikasion agingga iti Hulio 10, 2015.


(Naipablaak iti Bannawag, Hulio 6, 2015 a bilang.)