NALABON ITA TI APIT A LASONA! Kas gagangay, no adu ti produkto, lumaka met ti presio. Ngarud, gutgutigoten ti gobierno dagiti amin a mannalon a makipaset iti maysa a panagsanay iti Good Agricultural Practices (GAP) tapno maisuroda no kasano a mapapintas ti produktoda ket mabalindan ti makibalubal kadagiti dadduma pay a produkto iti ballasiw-taaw. No addaan ti mannalon iti sertipiko iti GAP, maipakita nga addaan ti mannalon iti umno a kabaelan a mangtaripato a nasayaat kadagiti mulana ken ammona a saluadan dagiti apitna; iti kasta, mabalinen a mailako iti ruar ti pagilian. Kadagiti mannalon a kayatna ti makipartisipar iti daytoy a programa, makiuman laeng iti kaasitgan nga opisina ti Departamento ti Agrikultura iti lugarda. Naala daytoy a ladawan iti Barangay Salsalamagui, Vintar, Ilocos Norte. Isursursor daytoy a mannalon ti apitna a lasona iti pagaaduan ti tao tapno laeng makalako a daras ket saan a malungsot lattan iti pagtatalonan gapu ta manmano met ti gumatang iti lasona iti lugarda. (Leilanie G. Adriano)
(Naipablaak iti Bannawag, Abril 6, 2015 a bilang.)
No comments:
Post a Comment