NABAKNANG TI ILI A CARASI iti probinsia nga Ilocos Norte kadagiti rekursos naturales. Kas maipakita iti nalit-aw a karayan ti Cura (kanigid) ken dagiti bambantay (kanawan) nga apon ti mineral reserves a kas iti iron ore, gold ken dadduma pay. Adu pay ti dadakkel a bato (decorative stones) a pagaayat dagiti Koreano nga al-alaen tapno may-export iti Korea. Kasla kano ngamin status symbol daytoy para kadakuada. Ditoy pay a masarakan ti maysa a dakkel a pagminasan nga inaprobaran ti gobierno ti Mineral Production Sharing Agreement ken Exploration Permit-na iti agarup 3,000 ribu nga ektaria a kabambantayan kalpasan a nagpaso ti permit-na nga agoperar iti dua a tawen iti tallopulo nga ektaria nga small-scale mining nga inaplikaranna. Ngem itay laeng kallabes, napasardeng ti pannakayallatiw dagiti dadakkel ken nabiag a bato iti Korea gapu ta segun iti baro nga administrasion ni Mayor Rene Gaspar iti nasao nga ili, bassit laeng ti mapaspastrek ti munisipio babaen ti panagbayadda iti extraction fee ket agamak dagiti lumugar nga awanen ti mabati a para kadakuada ket no saan a mapengdan daytoy, madadael met ti natural a buya ti nakaparsuaan iti lugarda. (Leilanie G. Adriano)
(Naipablaak iti Bannawag, Pebrero 24, 2014 a bilang.)
No comments:
Post a Comment