Maangay ti libre nga operasion kadagiti nadumaduma a sakit iti probinsia nga Apayao inton Marso 1-8, 2014 iti panangiwayat dagiti kameng ti Agkakabsat International Society of Philippine Surgeons iti America, a kaaduanna kadagitoy ti tubo iti Apayao.
Segun kadagiti organizer, nakasagana ti nasao a grupo a mangipaay iti libre nga operasion ken agas kadagiti ania man a klase ti major ken minor surgeries a kas iti cataract, tubal ligation, cyst, cleft palate, goiter, hysterectomy, ken kadagiti agpagabut iti ngipen.
Babaen ti pannakitinnulong ti gobierno probinsial, ti Departamento ti Salun-at ken ti Departamento ti Edukasion iti Apayao, manamnama ti naballigi a pannakaisayangkat ti surgical mission kadagiti sumaganad: Far North Hospital iti Luna para iti major ken minor surgeries; Amma Jadsac District Hospital iti Pudtol para iti tubal ligation ken plastic surgeries; Santa Marcela District Hospital para iti cataract ken dadduma pay a sakit iti mata; ken San Isidro Gymnasium iti Luna para iti panagpagabut iti ngipen.
Kadagiti dadduma pay a saludsod ken interesado a saan pay a nakapalista iti kallabes a pre-screening dagiti pasiente, agturong iti kaasitgan a Rural Health Unit wenno Municipal Health Unit iti Apayao tapno mairaman iti listaan. (Leilanie G. Adriano)
(Naipablaak iti Bannawag, Pebrero 24, 2014 a bilang.)
No comments:
Post a Comment