“Digital broadcasting,” maiwayat iti Filipinas

Kamaudiananna, maibilangton ti Filipinas kadagiti dadduma a pagilian a kameng ti Association of Southeast Asian Nations (ASEAN) a mangibasura iti analog broadcasting ket arakupennan ti digital broadcasting kalpasan ti panangirugi ti National Telecommunications Commission (NTC) iti panangadaptarna iti Japanese digital television system.

Maawagan iti Integrated Service Digital Broadcasting-Terrestial (ISDB-T) system a pinarnuay ti Japan, daytoy ti mangidanonto iti digital broadcasting iti sibubukel a pagilian ken mangipaay iti libre a digital TV signal. Iti sabali a pannao, nalawlawagton dagiti mabuya iti telebision uray pay kadagiti nalengleng a lugar a maidilig iti agdama a maar-aramat nga analog broadcasting.

Karaman iti sistema ti dagus a pannakaballaag dagiti umili kadagiti mapaspasungadan a kalamidad a maidanon babaen ti telebision ken uray kadagiti selpon ken sabsabali pay a mobile devices nga addaan iti television receiver.

Kuna ti NTC a manamnama a maibasuranton a mamimpinsan ti analog broadcasting iti uneg ti dua agingga iti tallo a tawen manipud ita.


(Naipablaak iti Bannawag, Disiembre 9, 2013 a bilang.)